“Киэҥ хабааннаах быыстапка буолла”

Коркинныы олоруохха! Коркинныы айыахха!” республикатааҕы быыстапка кыттыылаахтарын билиһиннэриини салгыыбыт. Россия Суруналыыстарын сойууһун чилиэнэ, биллэр коллекционер, билигин Манчаары аатынан спорт национальнай киинин отделын начаалынньыгынан үлэлиир Владислав Петрович Коротов – дэгиттэр дьарыктаах киһи.

Араас улахан таһымнаах күрэхтэһиилэри хаартыскаҕа түһэрэн, үйэтитэр. Спорт туһунан элбэх кинигэни бэчээккэ бэлэмнээн, оҥорон таһаарбыт ааптар быһыытынан биллэр. Аны кэлин сылларга коллекционер ыарыытыгар ылларан – араас значоктары, мэтээллэри, манньыаттары мунньуунан дьарыктанан, кылгас кэм иһигэр республикаҕа киэҥ билиниини ылла. Маны таһынан, Владислав Петрович бэйэтин үлэтигэр “Модун” спорткомплекска чааһынай библиотека оҥостон, сотору кэминэн ону үөрүүлээхтик аһарга былааннанар.

— Владислав Петрович, бу быыстапкаҕа эн туох-ханнык коллекциянан кытынныҥ?

— Быыстапка тэриллэрин эрдэ истибитим, инньэ гынан урут туруора сылдьыбыт спорт туһунан хаартыскаларбын, ону таһынан бэйэм редактордаан уонна хомуйан оҥорбут тустууга сыһыаннаах кинигэлэрбин, сурунаалларбын туруордум. Онтон ордук саамай астынарым, киэн туттарым суох. Ол иһигэр Сахаачча туһунан, Дмитрий Петрович Коркин үлэтин опытын туһунан Петр Кривошапкин бэлэмнээбит кинигэтин ордук астынабын.

Оттон саамай бастакы, спорка сыһыаннаах кинигэм – 2006 сыллаахха Сунтаарга ыытыллыбыт СР норуоттарын спортивнай оонньууларын көрсө таһаарбыт Сунтаар спордун туһунан кинигэм буолар. Ону таһынан, араас күрэхтэһиигэ сылдьыбыт бейджиктарым ити ыйанан тураллар. Республика иһинээҕи күрэхтэһиилэртэн саҕалаан, Россия чемпионаттарыгар Пресс-киини салайбытым, Дьокуускайга буолбут улахан күрэхтэһиилэр ити мас тардыһыыга аан дойду чемпионатыгар, “Азия оҕолоро” оонньуутугар Пресс-кииҥҥэ үлэлээбитим. Бэйэбит төрүт көрүҥнэрбитин араас дойдуларга тарҕатар, сайыннарар күрэхтэһиилэргэ – мас тардыһыытыгар, хапсаҕайга, атах оонньууларыгар, кумахха тустууга аан дойду чемпионаттарын бейджиктэрэ уонна көрөөччү быһыытынан сылдьыбыт күрэхтэһиилэрим: Турцияҕа 2011 сыллаахха Виктор Лебедев тустууга аан дойду чемпионатыгар бастыыр күрэхтэһиитигэр, 2015 сыллаахха Лас-Вегаска эмиэ аан дойду чемпионатыгар, 2008 сыллааҕы Олимпиадаҕа сылдьыбыт бейджиктарым… Итинник, күрэхтэһиилэр бейджиктарын барытын уура сылдьабын. Бэйэтэ өйдөбүнньүк, коллекция буолар.

— Бу күннэргэ быыстапка «Строительнай” рынок Быыстапкалыыр саалатыгар биир нэдиэлэни быһа үлэлээтэ. Дьон санаатын истэ-билэ сылдьарын буолуо, бу тэрээһин туһунан туох санаалар үөскээтилэр?

— Хомойуох иһин, мин Д.П. Коркин турнирын аан бастаан көтүттүм. Бүлүү өрүскэ улахан алдьархай тахсан, онно баран кэллим, уу боруобатын ыла, Алроса үлэтин кэтээн көрө. Инньэ гынан, быыстапкаҕа үчүгэйдик сылдьыбатым. Сүрдээх киэҥ хабааннаах, элбэх киһини хаппыт уонна араас хайысхалаах буолан, үчүгэй быыстапка тэриллибит. Бу матырыйааллары инникитин биһиги тустууга специалистарбыт булгуччу туһаналлара наада. Холобур, бу кинигэлэри, манныктар тахсыбыттар эбит, маннык матырыйааллар бааллар эбит диэн.

Итиэннэ эдэр ыччат, ордук саҥа көлүөнэ оннооҕор биһиги олимпийскай чемпионнарбыт ааттарын билбэттэриттэн киһи хомойор. Тустуунан дьарыктанар, номнуо онно-манна ситиһиилэммит уолаттар билбэттэр. Онон кинилэргэ бу быыстапка улахан, инникигэ кынаттыыр сулус буолуохтаах, иитэр суолталаах буолуохтаах. Маны биһиги спорка салайааччыларбыт, тренердэрбит дьиҥэр үчүгэйдик киэҥник билиһиннэриэхтэрин, пропагандалыахтарын сөп этэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *