Кикбоксинг: Петр Васильев, Тимофей Сивцев – Россия чемпионнара!

Чемпионат бүтэһик күнүгэр бастаан дьахталларга уонна эр дьоҥҥо ыйааһыннарынан чемпион аатын ким ыларын быһаарсар бүтэһик тыҥааһыннаах киирсиилэр буоллулар. Бу күн биһиэннэриттэн рингэҕэ үс кикбоксёр таҕыста.

51 кг маастарга кандидат Петр Васильев – Багай Оол Кежиги (кмс, Тыва-Хабаровскай) кытта кииристэ. Кыра ыйааһыннаах уолаттар диэх курдук – түргэннэрэ, сымсалара чыпчахай курдуктар. Петр Васильев утарсааччытын туох да мөккүөрэ суох чаҕылхайдык кыайбыта. Ол гынан баран, тувинец тоҕо эрэ наҕараадалааһыҥҥа пьедесталга тахсыбата. Балыйдылар диэтэҕэ дуу? Маннык түгэн сороҕор биһиги да күрэхтэһиилэрбитигэр көстөөччү, уопсайынан түһүлгэ балаһыанньатын быһыытынан, өскөтүн спортсмен биллибэт биричиинэнэн наҕараадалааһыҥҥа кэлбэт, тахсыбат буоллаҕына – киниэхэ мэтээл туттарыллыа суохтаах. Итинник түгэн – түһүлгэни киэргэппэт, төттөрүтүн сыппатар. Эһиги ону туох дии саныыгыт?

57 кг спорт маастара Тимофей Сивцев – Сафай Насухановы (кмс, Чечня) баһыйа туппута. Манна даҕатан эттэххэ, бу чемпионакка Чечня хамаандата саамай элбэх кыттааччылааҕа. Итиэннэ көһүтүллүбүтүн курдук чеченнэр – оҕолорго уонна улахан дьоҥҥо ханнык даҕаны хамаандатааҕар элбэх мэтээли ыллылар. Маннык күүстээх хамаанда чилиэттэрин баһыйа тутан, биһиги уолбут Тимофей Сивцев пьедестал үрдүкү үктэлигэр тахсыбыта үөрүүлээх!

Дьэ, онтон киэһэ, гала финалга саамай эрэнэр, опыттаах байыаспыт, норуоттар икки ардыларынааҕы кылаастаах спорт маастара Денис Андреев (67 кг) – Тамерлан Башировы (мсмк, Чечня) утары таҕыста. Бу сырыыга, спорт тылынан эттэххэ, Денис тоҕо эрэ иккис нүөмэринэн үлэлээтэ. Бу иннинээҕи көрсүһүүлэргэ наар атаакалаан, киирсии хаамыытын бэйэтэ дьаһайан, кимиилээхтик киирсибитэ. Билбэтим, баҕар, тренердэр чечени утары итинник тактиканан киирис диэбиттэрэ буолуо.

Денискэ кыайыыны баҕаран, көх-нэм буолан, көрөөччүлэр биир кэм хаһыытаан, үөгүлээн, кимиилээхтик киирсэригэр күөттүү сатаабыттара. Киирсии бүтүүтэ уолбут хоттум дии санаан, илиитин салгыҥҥа өрө ууммахтаан, трибунаҕа олорооччуларга эрэллээҕин биллэрбитэ. Ол кэмҥэ Баширов, арааһа кыайыыны рингэ хаһаайыныгар биэрээри гыннылар диэн, мөккүөрү тарда сатаата. Онно өйөбүл буолан чеченнэр тренердиин, спортсменныын бары саба сырсан кэлэн, Башировы өйүүллэрин биллэрдилэр. Маныаха судьуйалар сүбэлэһэ түһэн баран, кыайыыны Чечня байыаһыгар биэрэн, итии хааннаах Кавказ хотойдорун нэһиилэ уоскуттулар. Арай итиннэ Андреев илиитин көтөхпүттэрэ буоллар, өссө туох буолара биллибэт этэ…

Ол да буоллар, биһиги хамаандабыт тренердэрэ уонна спортсменнара, Денис Андреевы ситиһиилээхтик киирсибитинэн эҕэрдэлээн – көтөҕөн ылан, салгыҥҥа өрө быраҕаттаатылар.

Онон, биэс күн устата ыытыллыбыт Россия кикбоксиҥҥа чемпионатыгар Саха сирин улахан дьоҥҥо хамаандата барыта аҕыс мэтээллэннэ. Ол курдук, Петр Васильев (51 кг) уонна Тимофей Сивцев (57 кг) – кыһыл көмүс, Денис Андреев (67 кг) – үрүҥ көмүс, Айаал Местников (54 кг), Михаил Иванов (67 кг), Иван Захаров (51 кг), Христина Васильева (65 кг) уонна Айталыына Оконешникова (70-тан үөһэ кг) – боруонса мэтээллэринэн наҕараадаланнылар. Итинэн кинилэри тус бэйэлэрин уонна тренердэрин эҕэрдэлиэҕи баҕарыллар.

Күрэхтэһии кэтэһиллибитин курдук үрдүк тэрээһиннээхтик ыытыллан түмүктэннэ. Онуоха Спорт министерствота, «Триумф» Спорка бэлэмнэнии киинэ, Саха сирин кикбоксиҥҥа федерацията о.д.а. сыһыаннаах министиэристибэлэр, тэрилтэлэр, салайааччылар бу тэрээһини кыайа-хото тутан ыыппыттарын санатар тоҕоостоох. Итиэннэ биһиги республикабыт маннык улахан таһымнаах күрэхтэһиилэри төһө баҕарар тэрийэн ыытар кыахтааҕын өссө төгүл итэҕэттилэр.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *