“Киистэлээ! Киистэлээ!!”

Бээ, кэнники мас тардыһыытын күрэхтэһиитигэр хаһан сырыттым этэй? Оруобуна былырыын баччаларга эмиэ “Көмүс мас” күрэхтэһиитигэр эбит. Оччолорго да, ол иннинэ даҕаны көрөөччүлэр (спортсменнар) бэйэлэрин мадьыныларыгар сүбэлээн “Киистэлээ! Киистэлээ!” дииллэрин саҥа иһиттим. Саха төрүт көрүҥэ билигин сайдан, аан дойду таһымыгар таҕыста. Ол сиэринэн тыла-өһө да уларыйан иһэр.

«Модун» спортивнай комплексыгар мас-рестлиҥҥэ «Көмүс мас» диэн үгэскэ кубулуйбут Дьокуускай куорат аһаҕас чемпионата ыытыллан түмүктэннэ. Дьэ, кырдьык даҕаны хаһыытаһа-хаһыытаһа тардыалаһыы, үөгүлэһэ-үөгүлэһэ түсүһүү манна буолла. Ардыгар, санааҕар ким күүскэ хаһыытаабыт – ол кыайар курдук. Ол гынан, кыайыы өрөгөйүн бэлиэтээһин урукку курдук буолбатах, өрө күүрүү, үҥкүүлээһин, хамсаныы бэлиэтэммэтэ. Били, Роман Степанов “үрүүтүн” биир дойдулааҕа Артур Орлов хаста да көрдөрдө. Улуу пехлеван Александр Иванов этэн турар: “спортсмен түһүлгэҕэ, дьон иннигэр таҕыстаҕына син биир артыыс курдук буолуохтаах, туох баар дьоҕурун барытын арыйан көрдөрүөхтээх, көрөөччүлэргэ дуоһуйууну үөскэтиэхтээх”, — диэн. Кырдьык да оннук ээ.

Күрэхтэһиибитигэр төнүннэххэ, кыһыҥҥы-сааскы күрэхтэһиилэр барыта аны сайын Бэрдьигэстээххэ буолуохтаах Манчаары оонньууларыгар туһаайыллаллар. Бу күрэхтэһииттэн көрдөххө, хамаандалар номнуо онно бэлэмнэнэн, састааптарын талыыга үлэлэрин саҕалаабыттар. Онуоха бу түһүлгэ, састаабы тургутан көрүүгэ саамай тоҕоостоох түгэнинэн буолла диэххэ сөп. Манчаарыга хамаанда састаабыгар биирдии киһи киирэринэн, ханан даҕаны тыҥааһыннаах күрэстэһии буола турар.

Буолан ааспыт күрэхтэһии тыҥааһыннаах, сытыы киирсиилээх буолла. Ол туоһутунан, бу түһүлгэ саамай улахан ааттаах-суоллаах мадьыныта Евгений Удин бириистээх миэстэҕэ тиксибэтэ, республика чемпиона Борислав Степанов эмиэ үс иһигэр сатаан киирбэтэ, Егор Баишев бырааһынан уһуллан туораата…

Ол оннугар бүгүн Эҥсиэли хочотун үөрүйэхтээх, күүстээх мадьынылара күннээтилэр. Дыгын оонньуутун кыайыылааҕа буола сылдьыбыт Алексей Кутуков сэрэйдэххэ Манчаары оонньуутугар кыттаары дьарыгын сөргүппүт. Кини утарсааччыларын кими да киһилээбэтэ. Биир биллиилээх мадьыны Анатолий Гладков эмиэ кими даҕаны үрүҥ хараҕын өрө көрдөрбөтө. Ити курдук, ыарахан ыйааһыҥҥа ааспыт сыл түмүгүнэн Өлүөхүмэ бастыҥ спортсмена Евгений Попов үчүгэй бэлэмнээҕин көрдөрдө.

Күрэхтэһии бүтүүтэ били “Киистэлээһин” кистэлэҥин ыйыталаһан биллим.

-Гаазтааһын. Иһиттэн ылбыт киһи эрийэр, мотоцикл гаазтыыр курдук, киистэтинэн. Оччоҕо тастан ылбыт киһи тарбаҕа өһүллэр, — диэн, бу түһүлгэҕэ алта мэтээллэмит, ол иһигэр икки чемпионнаах Уус Алдан хамаандатын тренерэ Иван Готовцев быһааран биэрдэ.

Түһүлгэ иккис күнүн кыайыылаахтара:

Эр дьоҥҥо:

65 кг 1. Айтал Слепцов (ХИФУ), 2. Дмитрий Неустроев (Амма), 3. Герман Слепцов (Модун).

75 кг 1. Егор Атласов, 2. Артур Орлов (иккиэн – Уус Алдан), 3. Семен Атаков (ХИФУ).

90 кг 1. Алексей Кутуков (Нам), 2. Семен Иванов (Ньурба), 3. Василий Стручков (Мэҥэ Хаҥалас).

105-тэн үөһэ кг 1. Евгений Попов (АГАТУ), 2. Никита Пестряков (Уус Алдан), 3. Олег Барашков (Нам).

Бэтэрээннэргэ:

75 кг 1. Анатолий Гладков (Нам), 2. Максим Припузов (Хаҥалас), 3. Гаврил Ботуев (Үөһээ Бүлүү).

85-тэн үөһэ кг 1. Евгений Бережнов (Горнай), 2. Дьулустан Аржаков (Ньурба), 3. Андрей Винокуров (Хаҥалас).

Петр ПАВЛОВ.

Ааптар хаартыскаҕа түһэриитэ.  

Добавить комментарий

Ваш адрес email не будет опубликован. Обязательные поля помечены *