Киев-2021: Бастыҥ бөҕөһүнэн Ильяс Бекбулатовы ааттыахха сөп

Украина аатырбыт тустууктарын уонна тренердэрин кэриэстэригэр көҥүл тустууга норуоттар икки ардыларынааҕы турнир бүтэһик күнүгэр өссө биэс ыйааһыҥҥа кыайыылаахтар уонна призердар ааттара билиннэ.

Сүрүннээн сылыктааһын быһыытынан кыайыахтаах дьон кыайдылар. Арай, ыарахан ыйааһыҥҥа олохтоохтор эркин курдук эрэммит бөҕөстөрө – Александр Хоцяновскай бүтэһик быһаарыылаах хапсыһыыга поляк Камил Косциолекка хотторуута соһуччу соҕус буолла диэххэ сөп. Онон, өскөтүн гректии-римнии уонна дьахталлар тустууларыгар дьиэлээхтэр – украиналар өссө чемпионнаах эбит буоллахтарына, көҥүл тустууга биир даҕаны бастакы миэстэлэрэ суох.

Узбекистан, Азербайджан, Грузия, Польша – иккилии уонна Турция, Иран – биирдии чемпионнаннылар.

Санатан эттэххэ, бу түһүлгэҕэ Беларусь, Румыния, Кыргызстан аатыттан саха тустууга кыһатын биэс иитиллээччитэ күүһүн холоһон баран хоттордо.

Турнир бастыҥ бөҕөһүнэн 70 киилэҕэ бастаабыт Узбекистантан кыттар дагестанец Ильяс Бекбулатовы ааттыахха сөп буолуо. Кини бу түһүлгэҕэ утарсааччыларын этэргэ дылы, үрүҥ харахтарын өрө көрдөрбөккө, илиилээх-атахтаах оҥорбото. Тустар таһымынан үрдүк кэрдиискэ турарын көрдөрөн, холкутук бастаата.

Аны аныгыскы өрөбүллэргэ Италияҕа, Маттео Пелликоне аатынан норуоттар икки ардыларынааҕы рейтиннээх турнир ыытыллыаҕа.

Киевтээҕи турнир үһүс күнүн кыайыылаахтара уонна призердара:

61 кг.

  1. Ахмеднаби Гварзатилов (Азербайджан)
  2. Андрей Джелеп (Украина)
  3. Икромжон Хаджимурадов (Кыргызстан)
  4. Арман Елоян (Франция)

70 кг.

  1. Ильяс Бекбулатов (Узбекистан)
  2. Джабраил Гаджиев (Азербайджан)
  3. Исламбек Орозбеков (Кыргызстан)
  4. Алексей Борута (Украина)

79 кг.

  1. Ника Кенчадзе (Грузия)
  2. Рамазан Сари (Турция)
  3. Егор Акулич (Беларусь)
  4. Бекзод Абдурахмонов (Узбекистан)

92 кг.

  1. Ираклий Мцитури (Грузия)
  2. Даниил Пидлипинец (Украина)
  3. Ованес Мхитарян (Армения)
  4. Омаргаджи Магомедов (Беларусь)

125 кг.

  1. Камил Косциолек (Польша)
  2. Александр Хоцяновскай (Украина)
  3. Вахид Галаев (Азербайджан)
  4. Гиви Мачарашвили (Грузия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *