Киев  турнирыгар мэтээлэ суох хааллыбыт

Украина албан аатырбыт тустууктарын уонна тренердэрин сырдык кэриэстэригэр анаммыт норуоттар икки ардыларынааҕы турнир иккис күнүн түмүгүн билиһиннэрдэххэ, биһигиттэн Арыйаан Тютрин (57 кг) «уоскутар» бөлөххө туһунна уонна Айаал Лазарев (125 кг) күрэхтэһиини саҕалаата.

Бастакы ыйааһыҥҥа үһүс бириистээх миэстэҕэ чарапчыланар бөҕөстөр «уоскутар» диэн ааттыыр бөлөхтөрүгэр маҥнай Тарас Маркович бэйэтин киһитэ Сергей Терзины 10:0 кыайан баран, чочумча буолаат Арыйаан Тютрины утары туста таҕыста.

Хапсыһыы хайдах барбытын сиһилии суруйа сатаабаппын. Ону «Дьулурҕан» ютуб каналыгар  https://www.youtube.com/channel/UCdQWiPUliiKpPOVV3JKN.. киирэн көрүөххүтүн, бэйэҕит сыаналыаххытын сөп. Быһа түһэн тус санааны эттэххэ, олох сыыһа тустуу буолла. Итиннэ, төһө да харахха астаран баран, сымнаан, холкутуйан биэримиэххэ сөп этэ. Онон, кыайыыны бэлэхтээн кэбистэ…

Салгыы күрэхтэһиигэ Маркович – турнир боруонса мэтээлин иһин тустууга Шавкатовка (Узбекистан) хотторон, мэтээлтэн матта.

Бу күн ыарахан ыйааһыҥҥа баар-суох тустуукпут Айаал Лазарев күрэхтэһиини саҕалаата. Бастакы хапсыһыытыгар, квалификацияҕа кини немец Гудиновиһы 5:3 ахсаанынан хотто. Салгыы, финал 8/1-гэр беларус Песнягы куустуһа сылдьан сөрөн түһэрэн, устунан ыраас кыайыыны ситистэ. Онтон финал чиэппэригэр Европа эдэрдэргэ күрэхтэһиитин кыайыылааҕа буола сылдьыбыт, иллэрээ сыллааҕы Европейскай оонньуу үрүҥ көмүс призёра грузин Гиви Мачарашвилины кытта туһунна. Хапсыһыы наһаа сытыытык барда. Ахсаан төһө да 2:2 буолбутун үрдүнэн, биһиги быраабыла быһыытынан хоттордубут.

Уолаттарбытыгар бэрт кыра тиийбэтэ. Тустууну көрө олорон, арай итиннэ тус тренердэрэ тиийбиттэрэ, көбүөр таһыгар туран сүбэлээбиттэрэ буоллар, атын хартыына буолуо этэ диэн, бэйэни уоскутуна сатыыбыт.

Мачарашвили (125 кг) финалга тахсар иһин тустууга олохтоохтор эрэллэрэ Хоцяновскайга 4:5 ахсаанынан хотторон кэбиһэн, Айаал салгыы күрэхтэһэр суола сабыллан хаалла.

Онон, Киевтээҕи турниртан мэлийдибит. Санаабытыгар Арыйаан Тютрин уонна Айаал Лазарев саатар боруонса мэтээлгэ тиксиэхтэрин сөп этэ диэбит сылыктааһыммыт туолбата. Туох буолуой, олох салҕанар. Сууланан, суланан туһа суох. Саамай сүрүнэ, хотторууттан уруок оҥостон, өссө дьаныһан туран дьарыктаныахха наада. Хотторуу биричиинэтин атын дьоҥҥо көрдүү сатаабакка, бэйэ иннигэр эппиэтинэһи күүһүрдүөххэ дии саныыбын. Бэрт кыра тиийбэт курдук…

Петр ПАВЛОВ.     

 

Добавить комментарий

Ваш адрес email не будет опубликован. Обязательные поля помечены *