Киев турнирыгар биэс бөҕөспүт кыттыаҕа

Сарсыҥҥыттан Киевкэ – Украина аатырбыт тустууктарын уонна тренердэрин кэриэстэригэр көҥүл тустууга үгэскэ кубулуйбут норуоттар икки ардыларынааҕы турнир 24-с төгүлүн ыытыллаары турар. Турнирга – гректии-римнии, көҥүл уонна дьахталлар тустууларыгар 33 дойдуттан барыта 600 спортсмен кыттара күүтүллэр.

Бу улахан таһымнаах күрэхтэһиигэ саха тустууга кыһатын иитиллээччилэриттэн биэс бөҕөспүт тустуоҕа. Ол курдук, 57 киилэҕэ – Арыйаан Тютрин (Беларусь), 65 киилэҕэ – Андрей Бекренев, Ньургун Скрябин (иккиэн – Беларусьтан), Николай Охлопков (Румыния) уонна 125 киилэҕэ – Айаал Лазарев (Кыргызстан).

Өскөтүн атыттарбыт ити дойдулар ааттарыттан улахан турнирдарга кыттыбыттара ырааппыт эбит буоллаҕына, Арыйаан Тютрин Беларусь аатыттан норуоттар икки ардыларынааҕы түһүлгэҕэ бастакы сүрэхтэниитэ.  Уолаттарбыт ситиһиилээхтик кытталларыгар баҕарабыт!

Сарсын сарсыарда, сэрэбиэй түмүгүнэн бөҕөстөрбүт кимнээҕи кытта тустар буолбуттарын билиһиннэриэхпит.

Турнир бырагыраамата

Олунньу 26 күнэ, бээтинсэ

Көҥүл тустууга – 57, 65, 74, 86, 97 кг финалга тахсар иһин киирсиилэр.

Олунньу 27 күнэ, субуота

Көҥүл тустууга – 61, 70, 79, 92, 125 кг финалга тахсар иһин киирсиилэр.

Көҥүл тустууга – 57, 65, 74, 86, 97 кг финаллар.

Олунньу 28 күнэ, баскыһыанньа

Көҥүл тустууга – 61, 70, 79, 92, 125 кг финаллар.

Тустууну быһа биэриини – Украина тустууга ассоциациятын (wrestlingua.com) Ютуб каналыгар көрүөххэ сөп.

 «Дьулурҕан».

Добавить комментарий

Ваш адрес email не будет опубликован. Обязательные поля помечены *