Ипподром – ат сүүрдүүтүн ыытарга бэлэм!

// Хаартысканан репортаж

Дьэ, сарсын сарсыарда кэтэһиилээх-манаһыылаах аппыт сүүрдүүтэ буолар. Сүүрдүү – Арктикатааҕы судаарыстыбаннай агротехнологическай университет ипподромугар ыытыллар.

Бүгүн киэһэ сылдьан көрдөххө, ипподром – ат сүүрдүүтүн тэрийэн ыытарга бэлэм. Салама тардыллыбыт, былаахтар ыйаммыттар, пьедестал кырааскаланан саҥатыгар түспүт, трактор сүүрэр суолу дэхсилии сылдьар, телевидение массыыната кэлэн, үлэлииргэ бэлэм, “старт массыына” сүүрдүүнү кэтэһэр, рекламалар ыйаммыттар, арай трибуна иһийэн турар… Быһата, сүүрдүүгэ барыта бэлэм буолбут диэххэ сөп.

Санатан эттэххэ, коронавирус дьаҥынан сибээстээн сүүрдүү көрөөччүтэ суох ыытыллар. Ипподромҥа дьону киллэрбэттэр. Онон ат спордун таптааччылар күрэхтэһиини телевизорынан быһа көрүөхтэрэ. Этэргэ дылы, “күөх экраммыт” иннигэр туран, талан ылбыт аттарбытыгар “ыалдьабыт”. Дьэ, хайа ат кыайар?

Петр ПАВЛОВ.

Ааптар хаартыскаҕа түһэриилэрэ.   

Добавить комментарий

Ваш адрес email не будет опубликован. Обязательные поля помечены *