Ил Түмэҥҥэ мас-рестлинг сайдыыта түстэннэ

Бүгүн, сэтинньи 23 күнүгэр Мас-рестлиҥҥэ аан дойду III чемпионатын чэрчитинэн Саха Республикатын Государственнай Мунньаҕын (Ил Түмэн) дьиэтигэр “Мас-рестлинг сайдыытын кыһалҕалара уонна инники кэскилэ” диэн тиэмэҕэ “төгүрүк остуол” ыытылынна.

Тэрээһини Ил Түмэн ыччакка, физическэй култуураҕа уонна спорка бастайааннай кэмитиэтин бэрэссэдээтэлэ, РФ мас-рестлиҥҥэ федерациятын президенэ Михаил Гуляев иилээн саҕалаан ыытта. Бэлиэ түгэҥҥэ СР Государственнай Мунньаҕын (Ил Түмэн) бэрэссэдээтэлэ Петр Гоголев кыттыыны ылан, “төгүрүк остуол” кыттыылаахтарын эҕэрдэлээтэ. Сүрүн дакылааты СР Спорка миниистирэ Иннокентий Григорьев, “Сахаада-спорт” Ассоциация президенэ, мас-рестлинг аан дойдутааҕы федерациятын бастакы вице-президенэ Александр Ким-Кимэн оҥордулар.

Дьэ, ол кэнниттэн мас-рестлинг сайдыытын кыһалҕаларыгар уонна инники кэскилигэр сыһыаннаан дакылааты дьүүллэһии, ырытыы буолла. Кэпсэтиигэ мас-рестлинг аан дойдутааҕы федерациятын вице-президенэ, АХШ мас-рестлиҥҥэ федерациятын президенэ Одд Хоген, Финляндия мас-рестлиҥҥэ федерациятын президенэ Янтти Юха Веса, Чурапчытааҕы физическэй култуура уонна спорт институтун ректора Иннокентий Готовцев, ХИФУ физическэй иитиигэ кафедратын доцена, педагогическай наука кандидата, уруккута биллиилээх мадьыны Александр Захаров, ХИФУ спорт төрүт көрүҥнэригэр кафедратын доцена, педнаука кандидата, эмиэ биллиилээх мас тардыһааччы Егор Кудрин, мас-рестлинг теориятын уонна методикатын сэбиэдиссэйэ, аан дойду чемпиона Василий Алексеев, Украина мас-рестлиҥҥэ федерациятын президенэ Валерий Газаев, үрдүгү ойууга олимпийскай чемпион, мас-рестлинг Россиятааҕы федерациятын президиумун чилиэнэ Андрей Сильнов, Россия спорка юристарын холбоһугун президенэ Сергей Алексеев уо.д.а. кыттан, бэйэлэрин санааларын, көрүүлэрин эттилэр.

“Төгүрүк остуол” түмүгүнэн рекомендация бырайыага ылылынна. Ол быһыытынан, мас-рестлинг олимпийскай көрүҥ буолар кыахтааҕа этилиннэ, спорт бу көрүҥүн салгыы сайыннарыыга үлэни өссө күүһүрдэргэ, Дьокуускайга мас-рестлинг норуоттар икки ардыларынааҕы киинин тэрийэргэ, мадьынылар дьарыктанар тэриллэрин, экипировкаларын оҥорууну сайыннарарга, мас-рестлинг туһунан научнай уонна үөрэтэр-методическай үлэлэри салгыы таһаарарга, үрдүк таһымнаах специалистары бэлэмнээһини күүһүрдэргэ, о.д.а. былааннар ылылыннылар.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *