Ил Дархан бирииһин кыайыылааҕынан Брокер Барс буолла!

 

Дьэ, күүтүүлээх, долгутуулаах аппыт сүүрүүтэ түмүктэннэ. Сүүрүк аттары баайааччы, сүүрдээччи дьон сыралаах үлэлэрэ сыаналанна. Бүгүҥҥү күҥҥэ, этэргэ дылы, ким күүстээх, ким ордук бэлэмнээх, кыайыыга дьулуурдаах – ол бастаата.

Ол курдук, 800 миэтэрэҕэ алта ат кыттыбытыгар кыайыылааҕынан Арктика (Мэҥэ Хаҥалас, сүүрдээччи В.Петров, баайааччы В.Игнатьев) буолла. Иккис – Афина. Үһүс бириистээх миэстэни, дьон эрэ барыта бастыа диэн билгэлээбит ата – Нумизматик ылла. Салгыы миэстэлэри Төлөн, Леди Левинсон, Ассамблея ыллылар.

Иккис сүүрдүүгэ, 1000 миэтэрэҕэ, ат спордун сэҥээрээччилэрэ эрдэттэн Варадеро уонна Суфражистка бастакы миэстэни сүрүннээн былдьаһыахтара диэн сылыктаабыттара. Оннук да буолла. Кыайыылааҕынан Суфражистка (Нам, сүүрдээччи И.Иванов, баайааччы С.Ядреев) таҕыста. Варадеро иккис, Кул Джет үһүс буоланнар, эмиэ харчынан бириискэ тигистилэр.

1600 миэтэрэҕэ сүүрдүүгэ Николь (Мэҥэ Хаҥалас, сүүрдээччи О.Игнатьева, баайааччы В.Игнатьев) бастаата. Манна, Саха сирин ат спордун историятыгар бэлиэ түгэн бэлиэтэннэ. Ол курдук, аан бастаан киһи аймах кэрэ аҥаара – Ольга Игнатьева кыайыылаах аты сүүрдэн, биэтэккэ бастакынан аҕалла. Кини, биллиилээх ат баайааччы Василий Игнатьев кэргэнэ. Бу дистанцияҕа Армада иккистээтэ, Атланта үһүстээтэ.

Төрдүс сүүрдүүгэ (2000 м) “Югория” тэрилтэ бирииһигэр тоҕус быһый күөн көрсөн, илин-кэлин түһүстэ. Онуоха кыайыылааҕынан Арктик Бой (Амма, сүүрдээччи С.Тимофеев, баайааччы Н.Громов) таҕыста. Норд Стар иккис, оттон дьон үксэ бастыа дии санаабыт Түмэнэ үһүс бирииһи тутан хаалла.

Дьэ, онтон бэһис сүүрдүүгэ (2400) Ил Дархан бирииһэ – биэс мөлүйүөн оонньонно. Бүгүҥҥү күҥҥэ саамай күүстээх, быһый, уҥмат тыҥалаах аттар күөн көрүстүлэр. Билгэлээһин быһыытынан, дьон үксэ былырыыҥҥы кыайыылаах Майн Кениг бастыа дии санаабыттара. Ол эрээри, сүүрдүүгэ кыттыбыт аттар бары тэҥ баайыылаахтар, тэҥ кыахтаахтар диэххэ сөп. Сүрдээх тыҥааһыннаах сүүрдүү түмүгэр кыайыылааҕынан Брокер Барс (Мэҥэ Хаҥалас, сүүрдээччи В.Петров, баайааччы В.Игнатьев) тахсан, сүрүн бирииһинэн наҕараадаланна. Мэйзи Кинг биэтэккэ иккиһинэн кэллэ. Оттон Майн Кениг бу сырыыга үһүс буолла.

Итиэннэ бүтэһик сүүрдүү, СР Правительствотын бирииһигэр (3200 м) буолла. Манна Сандал (Нам, сүүрдээччи И.Иванов, баайааччы С.Ядреев) бастаата, биллиилээх спортсмеммыт, спорт үтүөлээх маастара, боксер Василий Егоров ата – Сайбер Шорт иккистээтэ. Жирков үсүһүнэн кэллэ.

Дьэ, ити курдук, быйыл сайыҥҥы ат сүүрдүүтэ төһө да онлайн буоллар, бэрт сэргэхтик, тэрээһиннээхтик ыытылынна. Манан сибээстээн, бары тэрийээччилэри: СР салалтатын, СР ат спордун федерациятын, “Саха” НКИХ, спонсордары, комментатордары итиэннэ бары ат баайааччылары, сүүрдээччилэри о.д.а. эҕэрдэлиэххэ, махтаныахха!

Петр ПАВЛОВ.

Ааптар “күөх экрантан” хаартыскаҕа түһэриилэрэ.    

Добавить комментарий

Ваш адрес email не будет опубликован. Обязательные поля помечены *