Илэ харахпынан көрөн, астынан кэллим!

      

Дойдубут көҥүл тустууга эдэрдэргэ күрэхтэһиитин (21 саастарыгар диэри) илэ харахпынан көрөн астынан кэллим. Саамай долгутуулааҕа уонна үөрүүлээҕэ – Саха тустууга оскуолата баарын эдэр уолаттарбыт дакаастаатылар!

Тустууну таптааччылар – уолаттарбыт, ордук чемпионнаабыт Станислав Свинобоев тустуутун сүрдээх үчүгэйдик ырыппыккыт, баҕа санааларгытын суруйбуккут. Ити урукку тустууктары, чуолаан Улуу тренербит Д.П. Коркин үөрэнээччилэрин олус үөрдэр. Тоҕо диэтэххэ, тустуу ыалдьааччылара бары бөҕөстөрбүтүгэр, тренердэргэ уонна тустууну сүрүннээччилэргэ, салайааччыларга үчүгэйи, кэскиллээҕи эрэ баҕарыахпытын наада.

Оччоҕо кыайыылар кэлиэхтэрэ! 57 киилэҕэ улахан эрэллээх барбытым, ол кыратык кыаллыбата. Биир дойдулааҕым Дархан Игнатьев күүстээх конкуренцияҕа бочуоттаах 3-с миэстэни ылан үөртэ. 70 киилэҕэ Станислав Свинобоев олох эрэллээхтик тустан ЧЕМПИОН үрдүк аатын ылыан ылла, онон Саха тустууну таптааччыларын дьэ улаханнык үөртэ уонна улахан кэскиллээҕин көрдөрдө!

Бу уолаттарбыт тустууларын олох тутан олорон көрдүм уонна улаханнык астынным, инникитин ситиһиилэри баҕарабын! Станислав финалга 0-5 кыайтаран иһэн, бэйэ бодотун тардынан, бэйэтин тустуутугар киллэрэн, туох да дьиэк биэрбэккэ дьоһун кыайыыны ситистэ. Киһини үөрдэрэ, манна олох ыһыллыбата уонна тустуу бүтүөр диэри харыс сири кэннинэн барбакка, наар инники кимэ сылдьан захватка үлэлээн кыайыылаах очукуолары ылбыта буолар. Туораттан көрдөххө, тренерскэй штаб, тус тренерэ Василий Уваров, олох кыайыыга эрэллээхтэрэ көстөр уонна уолбутугар күүс-уох, эрэл укпута саарбаҕа суох! Биир да ыгылыйыы, санаа түһүүтүн кыыма баарын бэлиэтээн көрбөтүм.

Бу эдэрдэргэ дойду сүрүн күрэхтэһиитигэр бэлэмнэнии үрдүк таһымҥа барбытын туоһута. Станислав Свинобоев чемпионнаабытын кэннэ атын регионнар тренердэрэ, күрэхтэһиини тэрийээччилэр, биллиилээх тустууктар (чуолаан Борис Будаев) уолбутун уонна тренердэрбитин эҕэрдэлээһиннэрэ киһини үөрдүөн-үөрдэр.

Түмүкпэр бары тустубут эдэр уолаттарбытыгар, тренердэргэ инникитин ситиһиилээх үлэни, улахан сыал-сорук туруоруналларыгар уонна ону хайаан да ситиһэллэригэр баҕарабын!

Валерий ЛЫТКИН, госсулууспа уонна спорт бэтэрээнэ

Добавить комментарий

Ваш адрес email не будет опубликован. Обязательные поля помечены *