Икки мэтээл баар! Охлопков иккис, Григорьев үһүс

Красноярскайга ыытылла турар Иван Ярыгин аатынан көҥүл тустууга норуоттар икки ардыларынааҕы Гран-при турнирга бүгүн үс ыйааһыҥҥа быһаарыылаах хапсыһыылар ыытылыннылар. Эрдэ эппиппит курдук, 61 кг ыйааһыҥҥа Николай Охлопков бастакы, оттон Эдуард Григорьев үһүс миэстэ иһин туһуннулар.

Румыния чиэһин көмүскүүр Николай Охлопков (тренерэ — Владимир Кириллин)турнир кыһыл көмүс мэтээлин ким ыларын быһаарар киирсиитигэр Россия чемпиона дагестанец Магомедрасул Идрисовы кытта көрүстэ. Бэҕэһээ Охлопков Григорьевы хайдах курдук холкутук кыайбытыттан сылыктаатахха уонна Идрисов хайдах эрэ инники хапсыһыыларга уота-күөһэ суохтук тустубутуттан, тус бэйэм, уолбут  киирсээ ини дии санаабытым. Ол эрээри, дагестанец дьиэк биэрбэтэ, 7:0 ахсаанынан кыайыыны ситистэ. Биһиги уолбут иккис түһүмэххэ кимэ сатаата да, тааска астарбыттыы – тугу да ситиспэтэ. Онон иккис миэстэҕэ таҕыста.

Оттон бу ыйааһыҥҥа турнир боруонса мэтээлин иһин киирсиигэ Эдуард Григорьев  (тренерэ Данил Неустроев) – Чинзориг Цэрмээни (Монголия) улаханнык илистибэккэ, 5:0 ахсаанынан хото тутта. Манна даҕатан эттэххэ, аҕыйах хонуктааҕыта Миндиашвили турнирыгар Григорьев бу монголу ыраастык хоппута.

Онон, Иван Ярыгин аатынан турнирга быйыл икки мэтээллэннибит: Николай Охлопков үрүҥ көмүс, Эдуард Григорьев – боруонса.

57 киилэҕэ Россия чемпионатын боруонса призера, чеченец Муслим Садулаев бастакы миэстэҕэ тахсыыта соһуччу соҕус буолла. Кини дьиҥнээх характердааҕын көрдөрдө. Нэдиэлэни кыайбат кэм иһигэр Миндиашвили түһүлгэтигэр үһүс миэстэлэнэн, Ярыгин турнирыгар кыл мүччү киллэриллибитэ. Аны киирэн баран, сүүмэрдиир хапсыһыыга тувинец Хуреш Дондук Оолу ыраастык кыайан, турнир сүрүн түһүмэҕэр киирбитэ. Онно китаеһы уонна монголу кыайталаан, финалга киһи эрэ барыта бастыа диэбит киһитэ – дагестанец Абасгаджи Магомедовы 4:4 ахсааҥҥа кыайда. Бу сүрдээх илистиилээхтик барбыт хапсыһыыга көрдөххө, Садулаев ойоҕоһун өлөрдө.

Манна сыһыары тутан эттэххэ, ити Миндиашвили турнирыгар Муслим Садулаев биһиги Арыйан Тютриммытыгар 4:5 ахсаанынан хотторбутуттан, араас санаалар үөскүүллэр… Ол аата, биһиги бөҕөспүт бэйэтин тустар таһымынан бастыҥнарга олох чугас сылдьар эбит диэн сылыктыахха сөп.

Турнир иккис күнүн түмүгэ:

57 кг: 1. Абасгаджи Магомедов, 2. Муслим Садулаев (иккиэн – Россия), 3. Нармандах Насанбуя (Монголия), Томас Гилман (АХШ).

61 кг: 1. Магомедрасул Идрисов (Россия), 2. Николай Охлопков (Румыния), 3. Эдуард Григорьев, Рамазан Ферзалиев (иккиэн – Россия).

70 кг: 1. Магомедрасул Газимагомедов (Россия), 2. Мандахнаран Ганзориг (Монголия), 3. Разамбек Жамалов (Россия), Энхбаяр Бямбадорж (Монголия).

Бүгүҥҥү күн түмүгүнэн сарсын финалга көрсүөхтэрэ:

65 кг: Ахмад Чакаев – Начын Куулар (иккиэн – Россия)

79 кг: Магомед Рамазанов – Ахмед Магомедгаджиев (иккиэн – Россия)

125 кг: Таха Акгуль (Турция) – Анзор Хизриев (Россия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *