Иван Михайлович, үбүлүөйгүнэн!

Бүгүн, кулун тутар 8 күнүгэр биһиги ытыктыыр, сүгүрүйэр киһибит, биир дойдулаахпыт, учууталбыт – ССРС уонна РСФСР норуотун үөрэхтээһинин туйгуна, Уус Алдан улууһун Бочуоттаах гражданина Иван Михайлович Жирков, лоп курдук 80 сааһын туолла.

Ытыктабыллаах Иван Михайлович, бүгүҥҥү Күн сирин көрбүт кэрэ бэлиэ күҥҥүнэн ис сүрэхтэн долгуйан туран эҕэрдэлиибит! Саха алмааһыныы кытаанах доруобуйаны баҕарабыт! Чугас дьонуҥ тапталларынан, өйөбүллэринэн угуттанан дьоллоохтук олороргор! Эдэр көлүөнэҕэ үтүө холобур, оттон тапталлаах дьиэ кэргэҥҥэр эрэллээх эркин, тирэх буоларгар! 80 cаас – дьоһун саас, ол да буоллар, эн билигин даҕаны эрчимнээххин, элбэҕи айар-тутар, суруйар- сырдатар, үйэтитэр кыахтааххын! Туруоруммут сыалгын-соруккун ситиһиилээхтик толороргор!

Иван Михайлович Жирков 1940 сыллаахха кулун тутар 8 күнүгэр Уус Алдан оройуонун Бээрийэ нэһилиэгэр төрөөбүтэ. Омскайдааҕы физическэй култуура институтун үөрэнэн бүтэрбитэ.

Дүпсүн уонна Мүрү 2 нүөмэрдээх орто оскуолаларыгар физкултуура учууталынан үлэлээбитэ, оҕо спортивнай оскуолатын дириэктэрдээбитэ.

Иван Михайлович – хайыһарга ССРС спордун маастарыгар кандидат, Саха АССР спордун маастара. Саха сирин ХХ үйэҕэ спорка лауреата. ССРС уонна РСФСР норуотун үөрэхтээһинин туйгуна, методист-учуутал, “Дети Саха Азии” норуоттар икки ардыларынааҕы фонда степиндиата. Уус Алдан улууһун Бочуоттаах гражданина. Педагогическай үлэ уонна РСФСР спордун бэтэрээннэрэ.

“Кырыс уонна оһорбо сирдэри туһаҕа таһаарыы”, “В.И. Ленин төрөөбүтэ 100 сылын туолуутунан килбиэннээх үлэтин иһин” мэтээллэринэн, республикаҕа физическэй култуураны уонна спорду сайыннарыыга үтүөтүн иһин бэлиэнэн наҕараадаламмыта.

Маны тэҥэ И.М. Жирков – Бороҕоннооҕу история мусуойугар “Спортивнай албан аат” сааланы төрүттээччи, “Уус Алдан чулуу спортсменнара ХХ үйэҕэ” кинигэ ааптара.

Иван Жирков спорка ситиһиилэрэ:

1965 – “Урожай” общество хайыһарга Киин сэбиэтин Дальнай Восток зонатааҕы күрэхтэһиитигэр 15 км сүүрэн үһүс миэстэни ылары ситиспитэ.

1965 – Уус Алдан улууһун кросска рекордсмена (1000 м – 2.45,0).

1965 – чэпчэки атлетикаҕа “Кыым” хаһыат республикатааҕы эстафетатын кыайыылааҕа.

1966 – “Урожай” ДСО иһинэн ыытыллыбыт элбэх күннээх велосипедынан күрэхтэһии үһүс этабын Нам – Хомустаах 40 км дистанцияҕа үһүс призера.

1966, 1969, 1970, 1971, 1974 сс. хайыһарынан сүүрүүгэ республика күрэхтэһиитигэр 15 км, 4:10 км эстафетаҕа биэс төгүл чемпионнаабыта.

1970 – “Урожай” ДСО уобаластааҕы сэбиэтин хайыһарга күрэхтэһиитигэр (50 км) бастаабыта.

1970, 1971 сс. Саха АССР профсоюзтарын кыһыҥҥы спартакиадатыгар хайыһарга (50 км) үһүс миэстэни ылбыта.

1971 с. Жатай – Дьокуускай маршрутунан (20 км) атаҕынан сүүрүүгэ үһүс миэстэ буолбута.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *