Иван Антипин: “Кавказка сахалары убаастыыллар”

-Икки сыл анараа өттүгэр уолум Кавказка баран эрчиллиэхпин, үөрэниэхпин баҕарабын диэбититтэн, аа дьуо толкуйдар киирэн барбыттара. Онон былырыын бастакы сылбытын Хотугу Осетия, Ингушетия, Чечня уонна Дагестан хайысханан, билсиһиини Владикавказтан саҕалаабыппыт, — диир Иван Антипин.

Иван Алексеевич Антипин бэйэтэ чааһынай грузовой массыыналаах, индивидуальнай предприниматель. Көҥүл тустуу бэриниилээх ыалдьааччыта. Уолун өйөөн тустууга элбэх үтүө холобурдары көрдөрөн, тренердэр, төрөпүттэр махталларын ылар.

Кини уола Алеша Антипин бастакы тренерэ Чурапчы Алаҕарыгар үлэлээбит Семён Андрианович Фёдоров буолар. Онтон Ньурба Мархатыгар, биһиги биир бастыҥ бөҕөспүт Владислав Андреев тренеригэр – Иван Васильевич Бурнашевка дьарыктаммыта. Эдэр тустуук бастакы республиканскай ситиһиилэрэ мантан саҕаламмыттара – “Боотурдар оонньууларын” уонна олимпийскай чемпион Павел Пинигин бирииһин хас да төгүллээх призера буолбута. Монголияҕа норуоттар икки ардыларынааҕы түһүлгэҕэ 3-с миэстэлээх, Казахстаҥҥа тренер Иван Иванович Соркомовтыын сылдьан, үстэ бастаабыта. Былырыыҥҥы сыл түмүгүнэн Ньурба улууһун бастыҥ спортсмен-үөрэнээччитинэн ааттаммыта.

Быйыл Хотугу Осетияҕа, Артур Таймазов кулуубун кытта хайаҕа, “Дзинага” диэн туристическай базаҕа дьарыктанныбыт, — диир Иван Алексеевич. – Москваттан ЦСКА оҕолорун кытта бииргэ, тренер Рамонов Станислав Фёдорович. Академия салалтата биһигини өйөөн, буор босхо дьарыктаммыппыт, кинилэргэ улахан махталлаахпыт, ордук дириэктэр Диана Казбековнаҕа. Оттон былырыын эмиэ Владикавказка, Хадарцевтар академияларыгар икки нэдиэлэ сбордаммыппыт. Салгыы Хасавюртка (Дагестан), аатырбыт “Спартак” спортивнай оскуолатыгар тиийбиппит. 

Ити курдук, Иван кэпсээнинэн, Ньурба тустууга оскуолатын кэнниттэн, салгыы сайдар сыалтан, уолун Бүлүү интернатыгар ыыппыт (тренер Роман Гаврильевич Окоемов). Итиннэ Бүлүү бөлөххө хардарыта кыайсар, үксүгэр хотторор уолаттара, П.Пинигин бирииһин үс төгүллээх чемпиона Ренат Спиридоновы, республика призёрдара Алексей Самсоновы, Володя Афанасьевы кытта тэҥҥэ дьарыктаммыт.

Бүлүү кэнниттэн билиҥҥээҥҥэ диэри Алеша Антипин ДЮСШ-3, республика оҕолорго хамаандатын старшай тренерэ Владислав Васильевич Петровка дьарыктанар.

Бу саҥа үөрэх сылыттан Владикавказ куоракка Аграрнай колледжка 9-с кылаас кэннэ “право и организация социальной работы” диэн үс сыллаах үөрэххэ киирдибит, — диэн кини салгыы үөрүүтүн үллэстэр. – Кавказ дьонун-сэргэтин, айылҕатын аһара сөбүлээтибит, бары сүбэлии-амалыы, көмөлөһө сатыыллар. Саха дьонун аһара убаастыыллар, “ыарахан, тыйыс айылҕалаах дойдуга олороҕут” дииллэр. Убайдарбытын олимпиецтары уонна Иван Николаевич Сивцевы, Виктор Николаевич Лебедевы, Иван Иванович Дмитриевы, Станислав Афанасьевич Захаровы үтүө тылынан ахталлар.

Эмиэ спортсмен оҕолорун өйөөн Кавказка хаста да сбордарга сылдьыбыт, биир көхтөөх төрөппүт Виталий Жирков: “Баанньа, төрөппүт уолун Алешаны (2004 с. т.) эрчиллэригэр дуогабар түһэрсэн, балаҕан ыйыттан үөрэттэрэ Владикавказ куоракка илдьэр буолла. Олимпийскай чемпион Артур Таймазов кулуубун иһинэн Аграрнай университет колледжыгар. Сахалартан, биир инникилээх, саха тустуутугар, сахалары саха дэтэр, эдэр тустуукка үчүгэйи баҕарыаҕыҥ!”, — диэн бэйэтин эҕэрдэтин тиэрдэр.

Инники сыалбыт – улахан таһымҥа киирсибит киһи диэн, аҕа киһи быһыытынан бүччүм баҕа санаалаах, спорт бэриниилээх ыалдьааччыта Иван Антипин. Кырдьык, түбүктээх үлэ түмүктээх буоларыгар баҕарыаҕыҥ!

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *