Зинаида Афанасьева бирииһигэр дьахталлар волейболлара

Кулун тутар 7-8 күннэригэр – Дьахталлар Аан дойдутааҕы күннэригэр Дьокуускай куорат 5 нүөмэрдээх оҕо спортивнай оскуолатыгар 50-тэн үөһээ саастаах бэтэрээн дьахталларга 12 төгүлүн республикатааҕы волейбол турнира Кыайыы 75 үбүлүөйдээх сылыгар ананан бэрт үрдүк тэрээһиннээхтик ыытылынна. Бу күрэхтэһии эдэр ыччакка холобур, бэтэрээн дьахталларга чөл, доруобай олоҕу, волейболу агитациялыыр, пропагандалыыр сыаллаах-соруктаах, Россия уопсай үөрэхтээһинин Бочуоттаах үлэһитэ, Саха сирин үөрэҕириитин, физическэй култуураҕа уонна спорка туйгуна, СахаВА бочуоттаах маастара Зинаида Афанасьева аатыгар сыллата ыытыллар.

Турнир 2009-2016 сылларга Уус Алдан Бороҕонугар тэриллибитэ, 2017 сылтан Дьокуускай куоракка буолар. Ол курдук, бу күрэхтэһиигэ 2009 — Мүрү, 2010 – Үөһээ Бүлүү, 2011 – Уус Алдан, 2012 – Уус Алдан, 2013 – Бүлүү, 2014 – Горнай, 2015 – Горнай, 2016 – Амма, 2017 – Мэҥэ Хаҥалас, 2018 – Мэҥэ Хаҥалас, 2019 – Бүлүү хамаандалара кыайыылааҕынан тахсыбыттара.

Быйылгы, уон иккис сылын ыытыллар турнирга 8 хамаандаттан 60-тан тахса бэтэрээн спортсменкалар кэлэн күөн көрсөн күрэхтэстилэр. Күрэхтэһии аһыллыытыгар Саха Республикатын волейболга федерациятын председателэ Ефимов Янис Владиленович кэлэн эҕэрдэлээтэ уонна республикаҕа волейбол сайдыытыгар үгүс кылааты киллэрбиттэрин иһин бочуотунай грамотаны З.Е. Афанасьеваҕа (Уус Алдан), Л.А. Брызгаловаҕа (Мэҥэ Хаҥалас), махтал суругу М.И. Кузьминаҕа (Амма), Е.В. Прокопьеваҕа (Горнай) туттарда.

Оттон Саха Республикатыгар “СахаВА” ОО председателэ Иванов Сергей Иванович тыа сиригэр волейбол сайдыытыгар үтүөлэрин, республикаҕа уонна улууска өр сылларга волейбол күрэхтэһиитин тэрийбиттэрин иһин өйдөбүнньүк мэтээли уонна махтал суругу З.Е. Афанасьеваҕа (Уус Алдан), А.С. Михайловаҕа (Дьокуускай), М.С. Пуховаҕа (Уус Алдан), «СахаВА бочуоттаах маастара» анал бэлиэни Н.И. Соловьеваҕа (Мэҥэ Хаҥалас), Е.С. Охлопковаҕа (Уус Алдан), бочуотнай грамоталары Г.Г. Кириллинаҕа (Уус Алдан), М.Ф. Оконешниковаҕа (Мэҥэ Хаҥалас); махтал суруктары Э.Ю. Егороваҕа (Уус Алдан), У.В. Игнатьеваҕа (Амма) туттарда.

Уус Алдан улууһун депутаттарын сэбиэтин председателэ, өр сылларга Уус Алдан волейболга федерациятын салайааччытынан үлэлээбит Колодезников И.И. эҕэрдэлээн тыл эттэ уонна кыайыылаах хамаандаларга Кубоктары туруорарын биллэрдэ. Саха эстрадатын чаҕылхай сулустара Розалина Файрушина уонна Сахамин эҕэрдэлээн ыллаатылар. Уус Алдан улууһун кыраайы үөрэтэр мусуойун методиһа Афанасьева А.Е. кэлбит спортменннары арчылаата, алҕаата.

Турнир кылаабынай судьуйатынан – бастакы категориялаах судьуйа Семен Егорович Афанасьев үлэлээтэ. Күрэхтэһии балаһыанньатынан түмүк икки көрүҥүнэн (эстафетнай сүүрүү, волейбол) таҕыста.

Ол курдук, эстафетнай сүүрүүгэ: 1 м – Амма, 2 м – Горнай, 3 м – Хаҥалас. Волейболга: 1 м – Уус Алдан, 2 м – Мэҥэ Хаҥалас, 3 м – Таатта. Уопсай түмүккэ: 1 м – Горнай, 2 м – Таатта, 3 м – Хаҥалас.

Күрэхтэһии түмүгүнэн «Бастыҥ оонньооччу» Оксана Куприянова (Мэҥэ Хаҥалас), «Бастыҥ охсооччу» Ирина Боярова (Уус Алдан), «Бастыҥ туруорааччы» Галина Стручкова (Мэҥэ Хаҥалас), «Бастыҥ көмүскээччи» Варвара Еремеева (Таатта), «Саамай наадалаах оонньооччу» Екатерина Охлопкова (Уус Алдан), Любовь Бурцева (Горнай), «Бастыҥ элбэх оҕолоох Ийэ оонньооччу» Ульяна Захарова (Мэҥэ Хаҥалас), «Бастыҥ элбэх сиэннээх Эбээ оонньооччу» Розалия Кармалах (“Дьүөгэлэр”), «Саамай муударай оонньооччу» Мотрена Иванова (Мэҥэ Хаҥалас) ааттаннылар.

Кыайыылаах хамаандаларга Кубок, грамота туттарылынна. Икки күннээх сыралаах оонньуу кэнниттэн кыайбыт оонньооччуларга мэтээл, грамота, сүүрүүгэ кыайбыт хамаандаларга грамота туттарылыннылар.

2017 сылтан бэтэрээн дьахталлар бэйэлэрин харчынан көмөлөрүн инбэлиит спортсменкаларга көмөлөһөллөр. Ол курдук, 2017 сылга – Юнчанова Саинаҕа (спорт глухих) – 2016, 2019 сс. аан дойду чемпионката уонна призера, 2016, 2017 сс. – Европа чемпионката, 2013-2019 сс. – Россия күрэхтэһитин 4 төгүллээх кыайыылааҕа уонна 5 төгүллээх призера. Россия күрэхтэһиитигэр барарыгар көмө харчы туттарыллыбыта. 2018 сылга Тарасова Еленаҕа (пода) – 2017, 2018, 2020 сс. Россия чемпионката, 2018 с. Россия кубогын кыайыылааҕар туттарыллыбыта. 2019 сылга – Алена Дмитриеваҕа (пода), волейболга Россия сүүмэрдэммит хамаандатын чилиэнигэр, 2015, 2016, 2019 сс. Европа чемпионката уонна призера, 2016 с. Альтернативнай Паралимпийскай оонньуу 2-с призера, 2018 с. Аан дойду чемпионката, 2018 с. Россия спордун үтүөлээх маастара. 2020 сылга – Семенов Семен Олеговичка (пода, колясочник) республика 10 төгүллээх ыытыыга, армспортка уонна коляскалаах сүүрүүгэ чемпионугар туттарылынна.

 

Күрэхтэһии кыттыылаахтара сыаналаах бириистэри тутаннар үөрэн-көтөн тарҕастылар. Тэрийэр хамыыһыйа уонна бары кыттыбыт спортсменнар ааттарыттан күрэхтэһии ыытыытыгар көмөлөспүт, спонсордаабыт дьонноругар улахан махталбытын тиэрдэллэр:  СР волейболга председателигэр Я.В. Ефимовка; СахаВА ВОО председателыгар С.И. Ивановка, республикатааҕы физкультураҕа уонна спорка Адаптивнай киин дириэктэригэр А.С. Михайловаҕа, республикатааҕы физическай культура уонна маассабай спорт управлениетын салайааччытыгар А.А. Моховка, Уус Алдан улууһун депутаттарын сэбиэтин председателэр И.И. Колодезниковка, 5-с нүөмэрдээх оҕо спортивнай оскуолатын дириэктэригэр А.Б. Слепцовка уонна Зинаида Егоровна бииргэ төрөөбүттэригэр, дьиэ-кэргэнигэр, дьүөгэлэригэр.

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *