Егор, Максим Крюковтар кэриэстэригэр…

Көҥүл тустууга ССРС спордун маастарыгар кандидат Егор Крюков уонна Максим Крюков кэриэстэригэр 2007-2008 сс. төрөөбүт оҕолорго республикатааҕы турнирга барыта 114 эдэр бөҕөс күөн көрүстэ.

Күрэхтэһиигэ Мэҥэ Хаҥаластан Хара, Аллараа Бэстээх, Төҥүлү, Аллайыаха (тренер Василий Брызгалов), Нам, Хатас, Тулагы, Дьокуускай куорат 3, 5 №-дээх спортивнай, 21 уонна 33 №-дээх орто оскуолаларын үөрэнээччилэрэ кыттыыны ыллылар. Күрэхтэһии кылаабынай судьуйатынан 1-кы категориялаах судьуйа Станислав Афанасьев, кылаабынай секретарынан Бүтүн Россиятааҕы категориялаах судьуйа Василий Уйгуров үлэлээтилэр.

Күрэхтэһии туһунан Дьокуускай куорат 3 №-дээх спортивнай оскуолатын тренерэ, бэтэрээн тустууктарга аан дойду икки төгүллээх чемпиона, Саха Республикатын үтүөлээх тренерэ Иннокентий Семенович Кочкин “Дьулурҕан” сайтка анаан маннык билиһиннэрдэ:

Бу күрэхтэһии иккис төгүлүн ыытылынна, бастакыта 2016 сыллаахха буолбута. Күрэхтэһиини Е.Е. Крюков бииргэ үөрэммит доҕотторо, аймахтара тэрийэн ыыталлар.

Егор Егорович Крюков Чурапчы спортивнай интернат-оскуолатыгар үөрэммитэ. Уола Максим биһиги оскуолабытыгар дьарыктаммыта. Биллиилээх бөҕөстөр Владислав Андреевы, Клим Гороховы, Владислав Петровы, Егор Дмитриеви, Вячеслав Кривошапкины кытта бииргэ эрчиллибитэ. Республикатааҕы турнирдарга элбэхтэ миэстэлэспитэ. Максим бииргэ тустубут доҕоро Кузьма Сивцев олохтообут 1000 солк. анал бирииһин хаһаайынынан 24 киилэ кыайыылааҕа Эльдар Осипов буолла.

Оҕолор тустууларын бэтэрээн тустуук, РСФСР чемпионатын призера, ССРС түһүлгэтигэр бэһис миэстэлээх Афанасий Захаров Чурапчы Кытаанаҕыттан кэлэн көрөн, сэргээн барда.

Түһүлгэ кыайыылаахтарынан буоллулар: 24 кг – Эльдар Осипов, 26 кг – Ариан Винокуров, 28 кг – Эрчим Жирков (үһүөн – ДЮСШ-3), 30 кг – Ярик Явловскай (Мэҥэ Хаҥалас, Хара), 32 кг – Богдан Сергеев, 35 кг – Данил Корнилов (иккиэн – ШВВ), 38 кг – Денис Федоров, 42 кг – Никита Евсеев, 46 кг – Айсен Васильев (үһүөн – ДЮСШ-3), 50 кг – Витя Фурсо (Дьокуускай 21 №-дээх оскуолата).

Добавить комментарий

Ваш адрес email не будет опубликован. Обязательные поля помечены *