Владимир Егоров, Ньургун Скрябин, Айаал Лазарев салгыы тусталлар

Болгария София куоратыгар көҥүл тустууга бүтэһик олимпийскай путёвкалары кимнээх ылалларын быһаарар аан дойдутааҕы турнир бүгүн түмүктэнэр.

Бөөлүүн финалга тахсар иһин хапсыһыылар буоллулар. Онуоха биһиги бөҕөстөрбүтүгэр сыһыаннаан эттэххэ, японец Такахашига хотторбут Владимир Егоров (57 кг) «уоскутар» бөлөххө киирэн румын Ризван Коваһы кытта тустар буолла. Онно хайалара кыайбыта, үһүс бириистээх миэстэ иһин кубинец Ортегалыын киирсиэҕэ.

Оттон Ньургун Скрябины хоппут М.Гаджиев финалга тахсыбытынан, биһиги бөҕөспүт Габриэл Янач диэн Австрия тустуугун кытта киирсиэҕэ. Манна ким кыайбыт грузин Ломтадзены кытта тустуоҕа. Хайалара хоппутун салгыы, үһүс бириистээх миэстэ иһин американец Оливер кэтэһэр.

Айаал Лазарев «уоскутар» бөлөххө молдован Романовтыын көрсүөҕэ. Салгыы, турнир боруонса мэтээлин иһин таджик Искандари, венесуэлец Диас бааллар.

Уолаттарбытыгар уостан хаалбакка, улахан спорка сылдьар дьон быһыытынан бүтэһиккэ диэри туох баалларынан киирсэллэригэр баҕарыаҕыҥ.

Финалга көрсүөхтэрэ:

57 кг Юки Такахаши (Япония) – Бехбаяр Эрдэнбат (Монголия)

65 кг Георгиос Пилидис (Греция) – Магомедмурад Гаджиев (Польша)

74 кг Василь Михайлов (Украина) – Магомедхабиб Кадимагомедов (Беларусь)

86 кг Сосуке Такатани (Япония) – Борис Макоев (Словакия)

97 кг Абрахам Коньедо Руано (Италия) – Альберт Саритов (Румыния)

125 кг Сергей Козырев (Россия) – Сумит Сумит (Индия).

Манна даҕатан эттэххэ, финалга тахсыбыттар бары – турнир балаһыанньатын быһыытынан дойдуларыгар олимпийскай путёвка аҕаллылар.

Хапсыһыылар биһиги бириэмэбитинэн 16:00 чаастан саҕаланаллар. Ону Тустуу аан дойдутааҕы түмсүүтүн (UWW) сайтыгар көрүөххэ сөп.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *