Егоров бастакы утарсааччыта – кубинец

Румыния киин куоратыгар ыытылла турар спортивнай тустууга 23 саастаахтарга диэри аан дойдуга бастыыр иһин күрэхтэһиигэ сарсыҥҥыттан көҥүл тустуу саҕаланар. Эрдэ dzulurgan.ru сайтка суруйбуппут курдук, бу иннинэ дьахталлар уонна гректии-римнии тустуулар ыытыллан түмүктэннилэр. Бүгүн – 57, 65, 79, 97 кг ыйааһыннаахтарга сэрэбиэй оҥоһулунна. Аны сарсын сарсыарда, күрэхтэһии иннинэ бөҕөстөр балаһыанньа быһыытынан ыйааһыннааһыны барыахтаахтар.

Санатан эттэххэ, бу күрэхтэһиигэ саха тустууга кыһатыттан икки бөҕөс кыттар: Владимир Егоров (57 кг) Македонияттан, Николай Охлопков (61 кг) Румынияттан.

57 киилэҕэ 19 кыттааччы баар. Биһиги бөҕөспүт иккис бөлөххө киирбит. Итиэннэ квалификацияҕа, ол аата, бастакы эргииргэ сэрэбиэй быһыытынан кубинец Андреу Ортеганы кытта тустуоҕа. Биллэрин курдук, былырыын Польшаҕа эмиэ сэтинньи ыйга ыытыллыбыт 23-гэр диэри саастаах тустууктарга аан дойду түһүлгэтигэр Владимир Егоров чуолаан ити кубинецка үһүс эргииргэ 1:3 ахсаанынан хотторбута.

Сиһилии билиһиннэрдэххэ, ол күрэхтэһиигэ Амма ыччата – алжиреһы 10:4, киргиһи 11:1 ахсааннарынан хотон баран, кубинецка сабырыйтарбыта. Киһитэ утарсааччыларын барыларын кыайталаан финалга тахсыбыта уонна чемпион үрдүк аатын ылбыта. Онон биһиги бөҕөспүт, кубинецка сирэй көрсөн хотторбуттар “уоскутар” диэн ааттыыр бөлөхтөрүгэр киирэн, казах Исмаиловка 4:8 ахсаанынан хотторон кэбиспитэ. Салгыы күрэхтэһиигэ Исмаилов үһүс бириистээх миэстэ иһин тустууга азербайджанец Парвиз Ибрагимовка 2:2 ахсааҥҥа хотторуулааҕынан ааҕыллыбыта. Түмүккэ Владимир Егоров ахсыс миэстэлэммитэ.

Бу сырыыга дьэ хайдах буолар? Уолбут Бундеслигаҕа утарсааччыларын үчүгэйдик кыайталаата. Оттон Ортега – Будапештка ыытыллыбыт эр дьоҥҥо аан дойду чемпионатыгар боруонса мэтээл иһин киирсиигэ былырыыҥҥы чемпион Юки Такахашига (Япония) тэҥ киирсиигэ бэрт кыранан сабырыйтаран, бочуоттаах бэһис миэстэ буолбутун бары билэҕит. Ол аата, кубинец үчүгэй тустар таһымыгар сылдьар.

Егоров-Ортега тустуутун кыайыылааҕа сэрэйдэххэ, эр дьоҥҥо Азия чемпионатын призера Занданбуд Занабазардыын (Монголия) тустуоҕа. Уопсайынан ыллахха, иккис бөлөх – бастакытааҕар састаап өттүнэн лаппа күүстээх буолбут. Ити Ортеганы, Занабазары тэҥэ, эр дьоҥҥо Азия чемпионатын быйылгы призера Тосихиро Хасегава (Япония) уонна Россия чемпионатын призера, А.Медведь турнирын кыайыылааҕа Муслим Садулаев иккис бөлөххө бааллар.

Күрэхтэһии кэнниттэн чемпионнартан ыйыттахха, хаһан да сэрэбиэйгэ наадыйбаппын диэччилэр. Хас биирдии хапсыһыыга – бүтэһик киирсиигэ курдук оҥостон тахсабыт диэччилэр. Ол – үчүгэй. Ол гынан баран, тус санаабар, син биир “кинилэр истэригэр кутуйах оонньуур буолуохтаах”, ханныгын даҕаны иһин сэрэбиэй улаханы быһаарар. Ылан көрүҥ, үөһээҥҥи бастакы бөлөҕү, киһи иилэ хабан ылар киһитэ азербайджанец Афган Хашалов эрэ баар. Оо, Владимир Егоров ити бөлөххө түбэспитэ эбитэ буоллар…

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *