Егоровтаах Сидоров финал чиэппэригэр таҕыстылар

Бүгүн, алтынньы 15 күнүгэр – Россия боксаҕа чемпионатын үһүс күнүгэр, “Триумф” Спорка бэлэмнэнии киинигэр туруоруллубут икки рингэҕэ, сарсыардааҥҥы түһүмэххэ – 49, 52, 56 киилэлэргэ, оттон киэһээҥҥи өртүгэр – 60, 69 кг ыйааһыннарга киирсиилэр буоллулар.

Бастакы ыйааһыҥҥа эркин курдук эрэнэр киһибит – спорт үтүөлээх маастара Василий Егоров Тулаттан кэлбит спорт маастарыгар кандидат Рашид Гасановы үс раунд тухары маастарыстыбата үрдүгүнэн баһыйа тутта. Өскөтүн биһиги боксербут бу иккис киирсиитэ эбит буоллаҕына, Гасанов бастакы эргииргэ сэрэбиэй быһыытынан сынньаммыта. Бу кыайыытынан Василий Егоров финал чиэппэригэр таҕыста. Онон сарсын кини маастар Шамиль Котлубаевы (Казань) кытта киирсиэҕэ.

49 киилэҕэ биир эрэнэр уолбут – Саха сирин хамаандатын капитана Борис Сидоров бэйэтин киһитэ Николай Матвеевы хотто. Салгыы киирсиигэ сарсын кини бу ыйааһын биир күүстээх боксера, Бакуга ыытыллыбыт Европа дойдуларын оонньууларын кыайыылааҕа Батор Сагалуевы (Бурятия) кытта киирсэр буолла.

Хомойуох иһин, бу ыйааһыҥҥа атын уолаттарбыт хотторуу хомолтотун биллилэр. Ол курдук, Петр Прокопьев – Володя Мнацакяҥҥа (Москва), Ян Максимов – Николай Харанхоевка (Улан-Удэ) хоттордулар.

52 киилэҕэ бу иннинэ биирдии кыайыылаах Талбан Егоровпыт, Артур Ложниковпыт уонна Николай Григорьевпыт табыллыбатылар, туһааннааҕынан – Эльбрус Солтухановка (Санкт-Петербург), Иван Абрамовка (Башкортостан) уонна Максим Стахеевка (Челябинскай) хоттордулар.

Онон бу ыйааһыҥҥа биэс уолбут кыттыбытыттан – бары хотторон туораатылар.

Дьиҥэ, мин көрбүппүнэн уонна атын да дьон этэллэринэн, Ложников баһыйбыт, бүтэһиккэ диэри атаакалаабыт, охсуолаабыт курдук этэ эрээри, судьуйалар кыайыыны кини утарсааччытыгар биэрдилэр. Хайыаххыный, бокс аата – бокс. Үрдүк таһымнаах судьуйалар биллэхтэрэ эрэ дииргэ тиийэбит.

Оттон 60 киилэҕэ Михаил Варламов – Анатолия Григорян (Краснодар) киирсиилэрэ тэҥ соҕус буолла. Онуоха судьуйалар мунаахсыйан баран, видеону үчүгэйдик көрөн, ырытан баран, кыайыылааҕы сарсын быһаарыах буоллулар. Эмиэ били, Халдеев-Шахбанов киирсиилэрин курдук.

Ити курдук күүстээхтэр сүүмэрдэнэн, күрэхтэһии дьэҥкэрэн иһэр. Аны сарсыҥҥыттан финал чиэппэрэ саҕаланар. Холобура, 49 киилэҕэ биһиги Василий Егоровпытын тэҥэ Новосибирскайтан кыттар тувинец Артыш Сояны, Эдмон Худояны (Челябинскай), Батор Сагалуевы (Бурятия) бэлиэтиэххэ сөп.

Онон бүгүҥҥү күннээҕи туругу түмүктээн эттэххэ, Василий Егоров, Борис Сидоров (иккиэн 49 кг) финал чиэппэригэр таҕыстылар, Михаил Варламов (60 кг) киирсиитин түмүгэ быһаарсыыга сылдьар, оттон Роман Обутов (75 кг) сарсын Тамерлан Казиевтыын киирсэр. Чемпионат үөрүүлээх аһыллыытыгар техническэй делегат Валерий Рачков эппитинии, “Любите бокс! Держите удар!”

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *