Егоровтаах Охлопков – Бухарест көбүөрүгэр


Сэтинньи 12-18 күннэригэр Румыния киин куоратыгар Бухарестка 23-гэр диэри саастаахтарга спортивнай тустууга аан дойду чемпионата ыытыллар. Бастаан бырагыраама быһыытынан күрэхтэһиини гректии-римнии тустууктар саҕалыыллар, онтон дьахталлар тустуулара буолар. Көҥүл тустуу 16-тан саҕаланар.

Биллэрин курдук, көҥүл тустууга аан дойдутааҕы күрэхтэһиигэ саха тустууга кыһатын икки иитиллэччитэ кыттыаҕа: Македонияттан Владимир Егоров 57 киилэҕэ уонна Румынияттан Николай Охлопков 61 киилэҕэ. Аҕыйах хонуктааҕыта Владимир Егоров тренерэ, СР үтүөлээх тренерэ Н.Н. Рожинныын Германия бундеслигаҕа күрэхтэһиитигэр ситиһиилээхтик тустан баран, аны Бухарест көбүөрүгэр бэлэмнэнэр. Оттон Николай Охлопковка тус тренерэ – СР көҥүл тустууга хамаандатын сүрүн тренерэ В.Н. Кириллин уонна тустуук Тимур Николаев Румынияҕа тиийэн көмөлөһө сылдьаллар.

Буолаары турар чемпионакка киирбит сайаапкалары көрдөххө, састаап күүстээх соҕус. Олимпиада, аан дойду уонна Европа чемпионаттарын, улахан таһымнаах турнирдар кыайыылаахтара уонна призердара бааллар. Ол курдук, Румыниятааҕы күрэхтэһии саамай үрдүк ааттаах-суоллаах тустуугунан 2016 сыллаахха Бразилияҕа ыытыллыбыт сайыҥҥы Олимпийскай оонньуу 57 киилэҕэ үрүҥ көмүс призера Рей Хигучи (Япония) буолар. Румыния көбүөрүгэр Рей син эмиэ бу күһүн Д.П. Коркин турнирыгар курдук, 65 киилэҕэ тустуоҕа. Сорохтор сөҕөллөр, Хигучи баччааҥҥа диэри 23-һүн туола илик дуо диэн. Кини 1996 сыллаахха тохсунньу 28 күнүгэр төрөөбүт. Ол аата, билигин сааһа 22-тэ.

Ити курдук, соторутааҕыта Венгрияҕа ыытыллан түмүктэммит аан дойду чемпионатын 74 киилэҕэ үрүҥ көмүс призера грузин Автандил Кенчадзе, ити чемпионакка 57 кг ыйааһыҥҥа бэһис буолбут кубинец Рейнери Андреу Ортега кыттыахтара. Өссө Канадаттан, Кыргызстантан, Венгрияттан, Монголияттан, Румынияттан, Болгарияттан, Словакияттан, Францияттан, Азербайджантан, Германияттан – Будапештка аан дойду чемпионатыгар кыттыбыт биирдиилээн бөҕөстөр кэлиэхтэрэ.

Ону тэҥэ эр дьоҥҥо Азия чемпионатын призердара Тосихиро Хасегава (Япония), Занданбуд Занабазар (Монголия), Улугбек Жолжозбеков (Кыргызстан), Давлетмурат Орызгылыжев (Туркменистан), Тумур-Очир Тулга (Монголия) бааллар. Бу түһүлгэҕэ Россия хамаандата күүстээх састаабынан кыттар. Ол курдук, хамаандаҕа бу сайын Одинцовоҕа буолбут дойду чемпионатын кыайыылааҕа Магомедрасул Идрисов, призердар Муслим Садулаев, Артур Найфонов бааллар.

Онлайн-видеотрансляцияны Тустуу аан дойдутааҕы түмсүүтүн (UWW) сайтыгар көрүөххэ сөп: https://unitedworldwrestling.org/even

Күрэхтэһии бырагыраамата:

Сэтинньи 16 күнэ, бээтинсэ

10:30 – 57, 65, 70, 79, 97 кг ыйааһыннарга барыллааһын хапсыһыылар.
5:15 – финалга тахсар иһин киирсиилэр.

Сэтинньи 17 күнэ, субуота

10:30 – 61, 74, 86, 92, 125 кг ыйааһыннарга барыллааһын хапсыһыылар.
10:30 – 57, 65, 70, 79, 97 кг ыйааһыннарга “уоскутар” бөлөх киирсиилэрэ.
5:15 – 61, 74, 86, 92, 125 кг финалга тахсар иһин тустуулар.
6 – 57, 65, 70, 79, 97 кг ыйааһыннарга финаллар.

Сэтинньи 18 күн, баскыһыанньа

4 – 61, 74, 86, 92, 125 кг ыйааһыннарга “уоскутар” бөлөх киирсиилэрэ.
6 – 61, 74, 86, 92, 125 кг финаллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *