Евро-2020: Чемпионакка – Италия, Куонкуруска – Петр Федоров кыайдылар!

Дьэ, Европа футболга чемпионата оруобуна биир ый устата ыытыллан түмүктэннэ. Бу, аан дойдуга бастакы нүөмэрдээх спорт көрүҥэр анаан үгэс быһыытынан «Дьулурҕан» хаһыат бэйэтин сайтыгар куонкурус тэрийбитэ. Онно, төһө эмэ бэрт кылгас болдьох бэриллибитин үрдүнэн, барыта 44 киһи бэйэтин билгэлээһинин ыыппыта.

Онуоха «Россия хамаандата бэйэтин бөлөҕөр бүтэһик буолуо» диэн сөптөөх хоруйу биэрэн – Петр Федоров, Иван Барашков уонна Василий диэн спорду сэҥээрээччи инники тахсыбыттара. Манна, куонкурус балаһыанньатын быһыытынан, тэҥнэһии түгэнигэр ким бэйэтин эппиэтин урут ыыппыт – ол кыайыылааҕынан тахсар диэн этэ да, тэҥнэһии буолбата.

Куонкуруска киирбит эппиэттэртэн салгыы көрдөххө, финалга Италия – Англия хамаандалара тэҥҥэ көрсүөхтэрэ диэн биир да киһи суруйбатах. Ол гынан баран, Николай (№7), Александр Владимирович (№10), Николай Жирков (№11), Петр Федоров (№16) – Италия хамаандата бастыаҕа диэн чуо билгэлээннэр, очукуо суруннулар. Ол оннугар, Англия бастыа диэбит – Айаал Васильевич (№5) уонна Прокопий (№25) хотторон кэбистилэр.

Куонкурус кыайыылааҕынан Россия хамаандата бэйэтин бөлөҕөр төрдүс миэстэни ылыа (1 очукуо), Италия финалга тахсыа (1 очукуо) уонна Италия чемпионнуо (1 очукуо) диэн түмүккэ үс очукуону ылан, кыайыылааҕынан бэйэтин эппиэтин 16-с киһинэн киллэрбит Петр Федоров буолла. Эҕэрдэлиибит!

Оттон Николай (№7), Александр Владимирович (№10) уонна Николай Жирков (№11) – 2-лии очукуоланнылар. Н.В. Васильев, Айал Васильевич, Евгений Дьячковскай, Иван Барашков, Платон Эверстов, Александр Максимович, Прокопий, Павел Ильин, Василий, Симак Т, Аяна, Михаил, Георгий, Николай, Денис – 1-дии сөптөөх хоруйу биэрдилэр.

Оттон Евро-2020 түмүгүнэн ким бастыҥ футболиһынан ааттаныай диэн ыйытыыга ким да сөптөөх хоруйу биэрбэтэ. Европа чемпионатын бастыҥ футболиһынан, ким да эрдэттэн сэрэйбэтэх киһитэ – Италия хамаандатын вратара Джанлуиджи Доннарумма ааттанна.

Куонкуруска кыттыбыт дьоҥҥо барыларыгар махтанабыт! Бу курдук өрүү, «Дьулурҕан» ыытар үлэтигэр көхтөөхтүк кыттаргытыгар ыҥырабыт. Аны, бириис көһүннэҕинэ баҕар, Олимпиада көҥүл тустууга күрэхтэһиитигэр куонкурус тэрийиэхпит. Онон, этэргэ дылы, биһиги сайтпытын http://dzulurgan.ru кэтии-маныы сылдьыҥ.

Эрдэ эппиппит курдук, куонкурус кыайыылааҕа Петр Федоров бу күннэргэ – Александр Брызгалов салайааччылаах Бүтүн Россиятааҕы ГТО физкультурнай-спортивнай комплекс Саха сиринээҕи киинин сыаналаах бирииһинэн наҕараадаланыаҕа.

«Дьулурҕан».    

Добавить комментарий

Ваш адрес email не будет опубликован. Обязательные поля помечены *