Евро-2020: Ким бастыҥ футболиһынан ааттаныай?

«Дьулурҕаҥҥа» биллэриллибит футболга Европа чемпионатыгар аналлаах куонкурска барыта 44 киһи бэйэтин сылыктааһынын ыыппыта. Кыттыбыт дьоҥҥо барытыгар барҕа махтал!

Куонкуруска ким хайдах эппиэттээбитэ барыта дьэҥкэтик көстө сылдьар. Туох да мөккүөр суох. Этэргэ дылы, хас биирдии киһи бэйэтин судьуйа курдук сананан, сайты арыйан – атыттар сылыктааһыннарын ааҕа-суоттуу, тэҥнии сылдьыан сөп.

Билэргит курдук, куонкурус түөрт ыйытыыттан турбута. Онно бииринэн, «Россия хамаандата бэйэтин бөлөҕөр хаһыс миэстэни ылыай?» диэн ыйытыы баара. Билиҥҥи туругунан ити ыйытыкка – киирбит сылыктааһыннары тэҥнээн көрдөххө, үс кыттааччы: Петр Федоров, Иван Барашков уонна Василий диэн спорду сэҥээрээччи, Россия футболга хамаандата бэйэтин бөлөҕөр төрдүс миэстэни ылыа диэн сөптөөх хоруйу биэрэннэр, инники сылдьаллар. Куонкурус балаһыанньатын быһыытынан, тэҥнэһии түгэнигэр ким бэйэтин эппиэтин урут ыыппыт – ол кыайыылааҕынан тахсарын өссө төгүл санатабыт.

Аны үс билгэлээһин түмүктэрин күүтэбит. Ким кыайарын биэтэк быһаарыаҕа.

Билигин чемпионат ортолоото диэххэ сөп. Куонкуруска дьон үксэ Франция хамаандата бастыа диэбитэ. Германия, Испания, Бельгия, Англия, Португалия да диэбиттэр аҕыйаҕа суохтара. Ол эрээри, хаһан баҕарар буоларыныы, соһуччу түмүктэр ханна барыахтарай? Билиҥҥи туругунан аан дойду чемпиона Франция уонна Европа чемпиона Португалия соһуччу туораатылар. Өссө туох буолан иһэр? Көрүөхпүт.

Оттон, «Ким «Евро-2020» бастыҥ футболиһынан ааттаныай?» диэн ыйытыыга саамай элбэхтэ (18) француз Киллиан Мбаппе ахтыллыбыта. Салгыы ааҕан көрдөххө, Нголо Канте (Франция), Криштиану Роналду (Португалия), Кевин де Брюйне (Бельгия), Харри Кейн (Англия) диэбит киһи элбэх этэ. Ону ылан көрдөххө, Мбаппе, Роналду туораатылар. Брюйне эчэйиилээх буолан, кыаҕын көрдөрө илик, оттон Кейн табыллан оонньообокко сылдьар. Дьэ, оччотугар ким бастыҥ футболиһынан буолар?

Куонкурус кыайыылааҕа – Александр Брызгалов салайааччылаах Бүтүн Россиятааҕы ГТО физкультурнай-спортивнай комплекс Саха сиринээҕи киинин сыаналаах бирииһинэн наҕараадаланыаҕа.

Петр ПАВЛОВ.     

 

Добавить комментарий

Ваш адрес email не будет опубликован. Обязательные поля помечены *