Евро-2020: Дьэ, Италия кыайар дуу, Англия дуу?

Европа футболга чемпионата биир ый устата ыытыллан түмүктүүр түһүмэххэ таҕыста. Бөөлүүн, финалга тахсар иһин иккис оонньууга англичаннар бэйэлэрин дьиэлэригэр – Лондоҥҥа, аатырбыт «Уэмбли» стадиоҥҥа датчаннары эбии бириэмэҕэ 2:1 ахсаанынан кыайдылар. Итинэн, футбол айыллыбыт дойдутун хамаандата, спорт бу көрүҥүн историятыгар аан бастаан Европа чемпионатын финалыгар таҕыста.

Дьэ, Италия кыайар дуу, Англия дуу? Көрүөхпүт!

Манан сибээстээн, «Дьулурҕан» хаһыат сайта http://dzulurgan.ru тэрийбит куонкурсун кыттыылаахтарын санааларын кылгастык ырытан көрүөҕүҥ. Ким кыайыан сөп эбитий? Син эмиэ Евро-2020 оонньууларыгар курдук, куонкурус иһигэр эмиэ кыайыылааҕы быһаарыы тыҥааһыннаахтык ыытылла турар.

Санатан эттэххэ, куонкурус ыйытыылара маннык этилэр:

-Россия хамаандата бэйэтин бөлөҕөр хаһыс миэстэни ылыай?

-Финалга ханнык хамаандалар көрсүөхтэрэй?

-Ханнык хамаанда бастакы миэстэни ылыай?

-Евро бастыҥ футболиһынан кими ааттыахтарай?

Онуоха «Россия хамаандата бэйэтин бөлөҕөр бүтэһик буолуо» диэн сөптөөх хоруйу биэрэн – Петр Федоров, Иван Барашков уонна Василий диэн спорду сэҥээрээччи инникилээн иһэллэр. Манна, куонкурус балаһыанньатын быһыытынан, тэҥнэһии түгэнигэр ким бэйэтин эппиэтин урут ыыппыт – ол кыайыылааҕынан тахсарын өссө төгүл санатабыт.

Куонкуруска киирбит эппиэттэртэн салгыы көрдөххө, биир да киһи финалга Италия – Англия хамаандалара көрсүөхтэрэ диэн суруйбатах. Ол гынан баран, финалга тахсыбыт хамаандалартан Англия (Айаал Васильевич №5, Прокопий №25), Италия (Николай №7, Александр Владимирович №10, Николай Жирков №11, Петр Федоров №16) бастыахтара диэн билгэлээһиннэрэ чугас курдуктар.

Оттон Евро-2020 түмүгүнэн ким бастыҥ футболиһынан ааттаныай диэн ыйытыыга киһи эрэ барыта эппит дьоно: Мбаппе, Роналду, Лукаку, Де Брюйне, Мюллер – хотторон дьиэлээбиттэрэ. Онон сэрэйдэххэ, итальянец Чиро Иммобиле уонна англичанин Харри Кейн диэн суруйбуттар очукуо аахсаллара буолуо. Холобур, Прокопий (№25), Павел Ильин (№27) – англичанин Харри Кейн «Евро-2020» бастыҥ футболиһынан буолуо диэн сылыктаабыттара туолуон сөп.

Чэ, куонкурус түмүктэнэрэ чугаһаата. Бачча, биир ый устата түүннэри кэтээн көрөн кэлэн баран, түмүгүн – бүтэһик быһаарыылаах оонньууну кэтэһиэххэ. Кыайыылаах – Александр Брызгалов салайааччылаах Бүтүн Россиятааҕы ГТО физкультурнай-спортивнай комплекс Саха сиринээҕи киинин сыаналаах бирииһинэн наҕараадаланыаҕа.

«Дьулурҕан».   

Добавить комментарий

Ваш адрес email не будет опубликован. Обязательные поля помечены *