Европа чемпионатыгар үс уолбут тустуоҕа

Олунньу 10-16 күннэригэр Италия киин куоратыгар – Римҥэ, спортивнай тустууга Европа чемпионата ыытыллар. Көҥүл тустуу бырагыраама быһыытынан гректии-римнии уонна дьахталлар тустууларын кэнниттэн ыытыллар. Син ол кэриэтэ, Россия сүүмэрдэммит хамаандатын састааба гректии-римнии уонна дьахталлар тустууларыгар эрдэ биллибит эбит буоллаҕына, көҥүл тустууга дьэ билиннэ.

Ол курдук, Россия спортивнай тустууга федерациятын уонна көҥүл тустууга хамаандатын тренерскэй сэбиэтин быһаарыыларынан, Европа чемпионатыгар тустуохтара:

57 кг – Азамат Тускаев (Хотугу Осетия), 61 кг – Александр Богомоев (Бурятия), 65 кг – Курбан Шираев (Дагестан), 70 кг – Исраил Касумов (Красноярскай), 74 кг – Магомедрасул Газимагомедов (Дагестан), 79 кг – Магомед Рамазанов (Москва), 86 кг – Артур Найфонов (Хотугу Осетия), 92 кг – Батырбек Цакулов (Хотугу Осетия), 97 кг – Абдулрашид Садулаев (Дагестан), 125 кг – Балдан Цыжипов (Бурятия).

Мантан көрдөххө, састаапка сүрүннээн соторутааҕыта Красноярскайга, Иван Ярыгин аатынан норуоттар икки ардыларынааҕы Гран-при турнирга кыайбыт бөҕөстөр киирдилэр. Арай, 97 киилэҕэ хамаанда хапытаана, олимпийскай чемпион Абдулрашид Садулаев быһа киллэрилиннэ.

Хамаанда саамай улахан ааттаах-суоллаах киһитинэн олимпийскай чемпион Абдулрашид Садулаев буолар. Кини, Россия көҥүл тустууга сүүмэрдэммит хамаандатын хапытаана. Садулаевка, чемпионнууругар эркин курдук эрэнэбит. Ылан көрдөххө, тус санаабар, россияннар Европа чемпионатыгар бары мэтээлгэ тиксэр кыахтаахтар. Ол эрээри, ханнык өҥнөөх мэтээлгэ? Ону көбүөр көрдөрүө.

Садулаевы тэҥэ — Тускаев, Богомоев, Шираев, Касумов, Газимагомедов, Найфонов бастыыр кыахтара улахан. Хамаанда дебютанынан Балдан Цыжипов буолар. Кини, Россия сүүмэрдэммит хамаандатын састаабыгар аан бастаан киирдэ. Биир даҕаны улахан таһымнаах официальнай күрэхтэһиигэ кытта илик.

Санатан эттэххэ, биһиги биир дойдулаахтарбытыттан Рим көбүөрүгэр үс бөҕөспүт тахсыа: 61 кг – Владимир Егоров (Хотугу Македония), Николай Охлопков (Румыния), 65 кг – Ньургун Скрябин (Беларусь). Кинилэр үһүөн Европа чемпионатыгар кыттыбыт үөрүйэхтээхтэр.

Өссө Владимир Егоров былырыын 57 киилэҕэ кыттан боруонса мэтээли ылбыта. Оттон быйылгы чемпионакка биир ыйааһыны өрө тахсан тустуо. Кини сүрүн соругунан, аныгыскы ыйга Будапештка ыытыллар Европа континенын Олимпиадаҕа сүүмэрдиир күрэхтэһиитигэр кыттыы буолар. Сэрэйдэххэ, Николай Охлопков эмиэ оннук сыаллаах-соруктаах.

Ханныгын да иһин, уолаттарбытыгар ситиһиилээх кыттыыны баҕарабыт уонна чемпионаты кэтээн көрөбүт.

Чемпионат бырагыраамата (Саха сирин бириэмэтинэн):

Олунньу 14 күнэ, бээтинсэ

19:30-23:00 – 57, 65, 70, 79, 97 кг ыйааһыннарга барыллааһын хапсыһыылар

00:45-01:45 – Ити ыйааһыннарга финалга тахсар иһин тустуулар.

Олунньу 15 күнэ, субуота

19:30-23:00 – 61, 74, 86, 92, 125 кг ыйааһыннарга барыллааһын хапсыһыылар. 57, 65, 70, 79, 97 кг «уоскутар” бөлөх тустуулара.

00.45-01:45 – 61, 74, 86, 92, 125 кг ыйааһыннарга финалга тахсар иһин киирсиилэр

02:00 – 57, 65, 70, 79, 97 кг ыйааһыннарга финаллар. Кыайыылаахтары наҕараадалааһын.

Олунньу 16 күнэ, баскыһыанньа

00:00-01:45 – 61, 74, 86, 92, 125 кг «уоскутар” бөлөх тустуулара.

02:00 – Финаллар. Кыайыылаахтары наҕараадалааһын.

«Дьулурҕан”.

Добавить комментарий

Ваш адрес email не будет опубликован. Обязательные поля помечены *