Д.П. Коркин үбүлүөйүн төрөөбүт Чурапчытыгар хайдах бэлиэтиэхтэрэй?


ССРС, РСФСР, Саха АССР үтүөлээх тренерэ, Саха АССР үтүөлээх учуутала Дмитрий Петрович Коркин төрөөбүтэ 90 сылын Чурапчыга үөрүүлээхтик бэлиэтиир санаалаахтар.

Бырагыраама быһыытынан Дмитрий Петрович төрөөбүт күнүгэр – балаҕан ыйын 5 күнүгэр Чурапчыга араас таһымнаах үбүлүөйдээх тэрээһиннэр ыытыллаллара былааннанар. Ол курдук, үөрүүлээх бэлиэтээһин сарсыарда Д.П. Коркин аатынан Чурапчытааҕы республиканскай спортивнай интернат-оскуолаҕа ыалдьыттары көрсүүнэн уонна бэлиэтээһинэн, Дмитрий Петрович аатынан уулуссаны үөрүүлээхтик аһыынан саҕаланыа.

Чурапчытааҕы физическэй култуура уонна спорт государственнай институтун үөрэтэр-лабораторнай корпуһугар Д.П. Коркин спортивнай-методическай ньыматын үөрэтэр кабинет аһыллыыта буолуоҕа, С.А. Новгородов аатынан “Бичик” тэрилтэ бэчээтинэй бородууксуйатын быыстапка-атыыта тэриллиэҕэ.

Эмиэ сарсыарда Д.П. Коркин пааматынньыгын таһыгар “Д.П. Коркин – учуутал, тренер, республикаҕа көҥүл тустууну төрүттээччи” диэн литературнай уус-уран композиция, үөрүүлээх линейка уонна сибэкки дьөрбөтүн ууруу ыытыллыаҕа.

Сахаттан бастакы олимпийскай чемпион Р.М. Дмитриев скверин үөрүүлээхтик аһыы буолуоҕа. Күнүс 11:00 чаастан республиканскай спортивнай интернат-оскуола актовай саалатыгар ССРС, РСФСР, Саха АССР үтүөлээх тренерэ, Саха АССР үтүөлээх учуутала Дмитрий Петрович Коркин төрөөбүтэ 90 сылыгар аналлаах нэһилиэнньэ үөрүүлээх мунньаҕа ыытыллыа.

Эбиэт кэнниттэн Спорка Албан аат музейын уонна Д.П. Коркин уһаайба-дьиэтин күргүөмүнэн көрүү тэриллиэҕэ.

Ону тэҥэ улуу тренер үбүлүөйүн үөрүүлээхтик бэлиэтээһин чэрчитинэн Екатерина Ивановна Винокурова сөптөөхтүк аһааһын туһунан лекцията ыытыллыаҕа. СР үтүөлээх тренерэ А.Т. Прокопьев чэбдигирдэр гимнастикаҕа (ушу, цигун); ССРС спордун маастара, СР үтүөлээх тренерэ И.М. Сысолятин, ССРС спордун маастарыгар кандидат И.С. Посельскай көҥүл тустууга; РФ спордун маастара В.В. Лисица бокска; РФ спордун үтүөлээх маастара Р.А. Поисеев тхэвондоҕа; норуоттар икки ардыларынааҕы кылаастаах спорт маастара И.Л. Марков кикбоксиҥҥа; ССРС спордун маастара Н.С. Спиридонова оҕунан ытыыга маастар-кылаастары тэрийиэхтэрэ.

Өссө биир кэрэхсэбиллээх тэрээһининэн, гроссмейстердар Гаврил Колесовы уонна Матрена Ноговицынаны кытта нуучча дуобатыгар биир кэмнээх оонньуу буолуоҕа. “Боотур Уус” стадиоҥҥа үөрэнээччилэр икки ардыларыгар “Коркин оонньуулара” күрэхтэһии ыытыллыаҕа.

Добавить комментарий

Ваш адрес email не будет опубликован.