«Триумф» Спорка бэлэмнэнии киинигэр — Д.П. Коркин аатын!

Бүгүн, балаҕан ыйын 5 күнүгэр ССРС, РСФСР, Саха АССР үтүөлээх тренерэ Д.П. Коркин кэриэһигэр көҥүл тустууга норуоттар икки ардыларынааҕы XI турнир иннинэ олохсуйбут үгэс быһыытынан, Р.М. Дмитриев аатынан Олимпийскай эрэл училищетын Тустууга саалатын иннигэр баар Дмитрий Петрович пааматынньыгар Сүгүрүйүү сиэрэ-туома ыытылынна. Кэрэхсэбиллээҕэ баар, бу үтүө тэрээһин оруобуна улуу тренер төрөөбүт күнүгэр – 90 сылыгар сөп түбэстэ.

Бу кэрэ бэлиэ түгэҥҥэ айылҕабыт тэҥҥэ үөрсэн, чаҕылхай, ыраас күнү бэлэхтээтэ. Үөрүүлээх тэрээһиҥҥэ СР Спорка миниистирэ Георгий Балакшин, Тустуу аан дойдутааҕы түмсүүтүн (UWW) бюротун чилиэнэ Ким Ик Джонг, СР Конституционнай суутун бэрэссэдээтэлэ Александр Ким-Кимэн, Олимпиада-1976 үрүҥ көмүс призера Александр Иванов, улуу тренер кэргэнэ Александра Коркина, турнир кылаабынай судьуйата Владимир Секлецов кыттыыны ыллылар.

Д.П. Коркиҥҥа сүгүрүйэн – эдэр спортсменнар, турнир бочуоттаах ыалдьыттара, спорт бэтэрээннэрэ уонна Саха сирин спорка общественноһа – улуу тренер пааматынньыгар сибэкки дьөрбөтүн уурдуллар.

Дмитрий Петрович бэйэтин дьаныардаах үлэтинэн Саха сирин, саха омугун аан дойду таһымыгар биллэрбитэ. Ол туоһутунан 4 олимпийскай мэтээли (ол иһигэр иккитэ кыһыл көмүс), Үтүө Дьулуур оонньуутун кыайыылааҕын, 4 – спорт үтүөлээх маастарын, 13 – норуоттар икки ардыларынааҕы кылаастаах спорт маастарын, 150 – ССРС спордун маастарын иитэн таһаарбыта. Бу сүҥкэн көрдөрүү.

Тыл этээччилэртэн Александр Ким-Кимэн спорт миниистиригэр туһаайан, “Триумф” Спорка бэлэмнэнии киинигэр улуу тренер Дмитрий Петрович Коркин аатын иҥэрэр туһунан боппуруоһу үөрэтэн көрөрүгэр эппитин, мустубут дьон сэҥээрэ иһиттилэр. Кырдьык даҕаны, Д.П. Коркин аатын үйэтитии салгыы баран иһиэхтээх. Дмитрий Петрович аата саҥаттан саҥа кыайыыларга, ситиһиилэргэ угуйа, ыҥыра туруохтаах.

Дьэ, аны үбүлүөйдээх тэрээһин сүрүн түһүмэҕэ – тустуу сарсыҥҥыттан саҕаламмытынан барар. Быйылгы турнирга 33 дойду 200-чэкэҕэ чугаһыыр бөҕөһө кыттыыны ылыаҕа. “Ким күүстээх, ким үчүгэй бэлэмнээх кыайдын!” диэн түһүлгэ кыттааччыларыгар алгыстарын тиэртилэр.

Добавить комментарий

Ваш адрес email не будет опубликован. Обязательные поля помечены *