Дьырылы алгыһынан дьолуотук…

Көҥүл тустууга ССРС спордун маастара, Саха сирин үтүөлээх тренерэ Николай Иванович Сафонов “Дьулурҕан” хаһыат биир бэриниилээх ааҕааччыта уонна көмөлөһөөччүтэ этэ.
Кини аҕа саастаах тустууктарбыт тустарынан хаһыаттарга, кинигэлэргэ сыламтата суох сырдаппыта. Улуу тренер Д.П. Коркины кытта бииргэ алтыһан үлэлээбит үөрүйэхтээх киһи тустууктарга уонна тренердэргэ анаан сүбэ аҥаардаах суруйуулара хаһан баҕарар туһалаахтар, ааҕааччылар биһирэбиллэрин ылаллар.
Николай Иванович өрүү сүбэлии-амалыы сылдьар амарах сүрэхтээҕэ. Саха сирин биллиилээх бөҕөстөрө Леонид Спиридоновка, Владислав Андреевка, Айаал Лазаревка, уо.д.а. тренер быһыытынан сирэй көрсөн албастары баһылааһыҥҥа, эҥкилэ суох оҥорорго туһалаах сүбэлэри, ыйыыны-кэрдиини биэрэрин таһынан, эбиитин суругунан сүбэтин-аматын, алгыһын анаан, кинилэргэ наар ситиһиини, кыайыыны-хотууну баҕара сылдьыбыт ытык кырдьаҕас.
Биһиги хаһыаппытыгар анаан тойуксут, алгысчыт, норуот ырыаһыта Николай Сафонов – Дьырылы маннык строкалары анаабыта:
Дьулуурдаахтар хаһыаттарын
“Дьулурҕаны” суруттарыҥ,
Тустуу, сырсыы ааттаахтарын
Тустарынан ааҕыталааҥ!
Бэҕэһээ, алтынньы 14 күнүгэр биһиги ытыктыыр киһибит, көҥүл тустууга ССРС спордун маастара, Саха АССР үтүөлээх тренерэ Николай Иванович Сафонов – Дьырылы төрөөбүтэ 90 сыла туолла. Биһиги кинини хаһан даҕаны умнуохпут суоҕа, Николай Иванович сырдык уобараһа сүрэхпитигэр өрүү тыыннаах буолуоҕа.
Доҕоттоор, бу түгэнинэн туһанан, Н.И. Сафоновы ахтан-санаан ааһыаҕыҥ.
«Дьулур5ан».

Добавить комментарий

Ваш адрес email не будет опубликован. Обязательные поля помечены *