“Дьулурҕан” — тустуу хаһыата”

Дьокуускай куорат 3 №-дээх спортивнай оскуолатын дириэктэрэ, СР физическэй култуураҕа уонна спорка үтүөлээх үлэһитэ, көҥүл тустууга бэтэрээннэргэ аан дойду чемпиона Федот Архипович Соловьев “Дьулурҕан” биир саамай бэриниилээх ааҕааччыта. Ааҕааччыта эрэ буолбатах, аҕам саастаах тустууктар, тренердэр, бэтэрээннэр күрэхтэһиилэрин тустарынан тиһигин быспакка суруйар, сырдатар биир көхтөөх ааптар буолар.

Федот Архипович бу уонча сыл устата хас чэппиэр ахсын сарсыарда хаһыат киоскатыгар уочараттаан, “Дьулурҕаны” атыылаһар. Биири эрэ буолбатах – иккини! Биирин бэйэтэ салайар оскуолатын киирии ааныгар баар “Спорт сонуннара” дуоскаҕа ыйыыр, оттон иккиһин остуолугар ууруна сылдьан ааҕар. Ити курдук, биир даҕаны нүөмэри көтүппэт.

Кырдьык, хаһыаты оҥорон таһаарар киһиэхэ, кини үлэтин итинник сыаналыыллара, үрдүктүк туталлара үчүгэй бөҕө буоллаҕа дии.

— “Дьулурҕан” сүрүннээн көҥүл тустуу туһунан суруйар, кэпсиир, – диир Ф.А. Соловьев. – Оттон көҥүл тустуу биһиги республикабытыгар маҥнайгы нүөмэрдээх спорт көрүҥэ. Тустууну Саха сиригэр таптыыллар. Тустууну сэҥээрэллэр. Биир тылынан, “Дьулурҕан” – тустуу хаһыата. Спорт бу көрүҥэ сайдарыгар, дьоҥҥо-сэргэҕэ биһирэбили ыларыгар эһиги кырата суох оруолу ылаҕыт. Ити үлэҕит ситиһиилээх буоллун!

“Дьулурҕаны” хаһыаты кытта доҕордоһуҥ, dzulurgan.ru сайты кытта олоххо тэҥҥэ хаамсын!  

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *