“Дьулурҕан” кыайыылааҕынан малдьаҕардар буоллулар

Хаҥалас. Улахан Аан 2-c Мальдаҕар орто оскуолатын салалтатын көҕүлээһининэн Саха Республикатын үөрэҕириигэ туйгуна, Үөрэх систиэмэтин бочуоттаах бэтэрээнэ Валентин Васильевич Павлов кэриэһигэр саха төрүт оонньууларыгар “Дьулурҕан” бэстибээлэ онлайн ыытылынна.

Бэстибээл биэс көрүҥнээх: кириэс тэбии, көтөх ынах, ойбонтон уулааһын, хаамыска, тутум эргиир. Барыта тоҕус хамаанда кытынна. Манна балаһыанньа быһыытынан 15 саастарыгар диэри – икки кыыс, икки уол кытынна. Күрэхтэһии кылаабынай судьуйатынан Розалия Федоровна Старостина үлэлээтэ.

Уопсай хамаанданан түмүккэ 2-с Малдьаҕар бастаата. Иккис миэстэни Горнай Маҥыраһын оҕолоро ыллылар. Үһүс бириистээх миэстэҕэ Кэбээйи хамаандата таҕыста. Салгыы миэстэлэри Күндэйэ, 2-с Дьөппөн, Бордоҥ, Тумул, Покровскайдааҕы 2 №-дээх оскуола уонна Хачыкаат хамаандалара ыллылар.

Көтөх ынаҕы туруорууга – Максим Кобяков (Кэбээйи), ойбонтон уулааһыҥҥа – Егор Данилов (Кэбээйи), хаамыскаҕа – Стас Максимов (Маҥырас), тутум эргииригэр – Василий Архипов (2-с Малдьаҕар) бастыҥ көрдөрүүлэннилэр. Оттон кыргыттарга кириэс тэбиигэ – Лилия Федорова (2-с Малдьаҕар), ойбонтон уулааһыҥҥа – Ньургустаана Игнатьева (Күндэйэ), хаамыскаҕа – Лиза Осипова (2-с Малдьаҕар), тутум эргииригэр – Евгения Леонтьева (2-с Дьөппөн) инники буоллулар.

Оттон биирдиилээн түмүккэ биэс көрүҥ кэнниттэн уолаттарга 18 кыттааччыттан Кэбээйи үөрэнээччитэ Егор Данилов кыайда. Иккис миэстэни Маҥырастан Василий Иванов ылла. Үһүс миэстэҕэ 2-с Малдьаҕартан Василий Архипов таҕыста.

Кыргыттарга 2-с Малдьаҕартан Лилия Федорова бастаата, Лиза Осипова иккистээтэ, 2-с Дьөппөнтөн Евгения Леонтьева үһүстээтэ.

Өссө XX үйэ саҕаланыан инниттэн спорка, чөл олоххо аналлаах “Дьулурҕан” хаһыат бэчээттэнэн тахсыаҕыттан, Саха сиригэр “Дьулурҕан” диэн аат тэнийэн иһэриттэн биһиги сүрдээҕин үөрэбит. Ол курдук, Уус Алдан Суоттуттан Дьулурҕан диэн сүүрүк сылгы баара, Дьулурҕан диэн ааттаах уолаттар баар буоллулар, аны ити “Дьулурҕан” күрэхтэһии тэриллэр…

Дьулурҕан – ол аата, инникигэ дьулуурдаахтык дьулус, бэйэҥ сыалгын-соруккун ситис диэн дьиҥ сахалыы тыл. Дьулурҕан кэҥээн, тэнийэн истин!

“Дьулурҕан”.

Хаартыскаҕа: иккис миэстэни ылбыт Горнай Маҥыраһын хамаандата (салайааччы – физкултуура учуутала Айталина Степановна Колодезникова).

Добавить комментарий

Ваш адрес email не будет опубликован. Обязательные поля помечены *