«Дьулурҕан» дьылҕатын туһунан

//Суруллубукка сэҥээрии

“Забота-Арчы” хаһыат бу дьыл ыам ыйын 27 күнүнээҕи нүөмэригэр спорка аналлаах “Дьулурҕан” сыһыарыыга Петр Павлов “Дьулурҕан” иннин диэки дьулуурдаахтык дьүккүйэр” диэн суруйуута бэчээттэммитэ. Ону кичэйэн ааҕан баран, бэйэм санаабын биллэриэхпин баҕардым.   

«Дьулурҕан» хаһыат сүүрбэ сыл курдук бэйэтин суолун-ииһин тобулан араас моһоллору, харгыстары да туораан күн бүгүн тус ааҕааччыларын булан, салгыы күн сирин көрөн тахса турарыгар элбэх киһи баҕа санаатын этэр.

Сахаҕа – хапсаҕай, көнүл тустуу бастакы нүөмэрдээх спорт көрүҥнэрэ буолаллара бу өбүгэ үгэһин салҕааһын буолар. Билиҥҥи спорт наукаҕа, үөрэххэ тирэҕирэн государство өйөбүлүнэн чөл, чэбдик олоҕу пропагандалыыр биир тутуһааччы, тарҕатааччы буолара саарбаҕа суох.

Спорт национальнай көрүҥнэрэ дьон-сэргэ биһирэбилинэн сайдан кэллилэр, спортивнай федерациялар үлэлииллэр, үлэлэрин, ситиһиилэрин көрө-истэ сылдьабыт. Маны сэргэ эйгэтэ кэҥээн ат спорда, «Дыгын оонньуулара”, ытыы спорда, ох саа, спорт сайдар программаларын сиһилии ырытыы, спорду таптааччылар этиилэрэ, спорт ветераннарын ахтыылара, ситиһиллибит көрдөрүүлэр историялара…

Ханнык да хаһыат сиһилии суруйуо суоҕа, сорох түгэннэргэ бардылар-кэллилэр, ким бастаата, эбэтэр хааллыбыт эрэ диэн буолбакка, дьон интэриэһин тардар, кыттыытын көҕүлүүр буолуохтара, күүс-көмө, өйөбүл, өй-санаа, үп-харчы да өттүнэн араас фондалар тэриллэллэригэр төһүү буолуо.

Дьиҥэ «Дьулурҕан» туспа хаһыат буолан тахсара оруннаах, эйгэтэ киэҥ, хас биирдии киһиттэн, дьиэ кэргэнтэн саҕаланыахтаах, Аан дойду түһүлгэлэрин кинилэр ситиһиилэринэн  «ыалдьааччылаах» буолалларынан уратылаах. Араас түһүлгэ сонунун киэҥ ааҕааччыга тиэрдэр спортивнай суруналыыстарбыт суруйууларын, ырытыыларын бэл атын дойду специалистара сөҕөллөр-махтайаллар.

Аны хас нэдиэлэ аайы тахсара сөп этэ. Билиҥҥи кэм информацията, сонуна түргэн, ону баттаһа сырдатар көдьүүстээх. Ааспытын, сойбутун, бүтэр бүппүтүн кэннэ кэпсиир, иһитиннэрэр сымсах. Онон субу оһохтон буһан тахсыбыт килиэп курдук, сибиэһэй, буруолуу сылдьар буолуохтаах.

«Дьулурҕан» сахалыы тыллаах хаһыат буолан, нэдиэлэҕэ биирдэ тахсан өссө буһан-хатан, тыыллан-хабыллан тахсыа диэн эрэнэбин.

Спорду таптааччы Петр ТИХОНОВ.

Мэҥэ Хаҥалас.

Добавить комментарий

Ваш адрес email не будет опубликован. Обязательные поля помечены *