“Дьулурҕантан” үлэбин саҕалаабытым

//»Дьулурҕан» 20 сыла

2015 сыллаахха үөрэхпин бүтэрэн сыл аҥаара дуогабарынан “Саха сирэ” хаһыат иһинэн баар «Эдэр саас» сыһыарыыга үлэлээбитим. Ол сырыттахпына, 2016 сыл тохсунньутугар хаһыаппыт оччотооҕу эрэдээктэрэ Чокуур Николаевич Гаврильев: «Дьулурҕаҥҥа» миэстэ таҕыста, көһүөҥ дуо?» – диэн ыйыппыта. Мин тута сөбүлэһээт, үөрүүбүттэн ол күн малбын 221-с кабинекка көһөрөн кэбиспитим. Ол курдук, Петр Семеновичтыын бииргэ үлэлиир буолбуппут.

Кини онно тута салгыы хайдах үлэлиирбитин кэпсээбитэ, эбээһинэстэрбитин үллэстибиппит. Миигиттэн спорт ханнык көрүҥүн ордорорбун ыйыппыта, онуоха мин мас тардыһыыта диэбитим быһыылаах. Онон, тута Хатаска ыытыллыбыт “Көмүс мас” күрэхтэһиини суруйа барбытым. Кими даҕаны улаханнык билбэт буолларбын, икки күн устата олус табыллан үлэлээбитим.

“Дьулурҕан” өрүү ыалдьыттардаах буолара. Кып-кыракый кабинеппытыгар ардыгар 6-7 киһи тэҥинэн кэлэрэ. Күрэхтэһиини онлайн көрө, сонун истэ, сурук аҕала, интервью биэрэ диэн кэлэллэрэ. Ол быыһыгар төлөпүөммүт тохтоло суох тыаһыыра. Дьон спортсменнарбыт күрэхтэһиигэ хайдах кытта сылдьалларын, ханна сборга барбыттарын, бэл, хаһан, туох күрэхтэһиитэ буоларыгар тиийэ биһигиттэн сураһара. Аны араас улуустартан, куораттан да буоллун илиинэн суруллубут сурук быыстала суох кэлэрэ. Саамай элбэх суругу тутар отдел этибит. Сурутааччыларбыт почтанан ыыталларын таһынан, дьонунан эмиэ ыыталлара.

Үгүс күрэхтэһии өрөбүллэргэ ыытыллар. Онон биһиги Петр Семеновичтыын өрөбүлэ суох үлэлиирбит. Субуота, өрөбүл күрэхтэһиигэ сылдьарбыт, онтон бэнидиэнньиктэн үлэ нэдиэлэтэ саҕаланар буоллаҕа дии. Күрэхтэһиигэ барыахпыт иннинэ ким тугу суруйарын эрдэ былаанныырбыт, хаһыаппытын ойуулаан көрөр этибит. Өрөбүлэ да суох үлэлээтэрбит, балаһаларбытын биирдэ даҕаны хойутаан туттарбыппытын өйдөөбөппүн. 2016 сылга “Саха сирэ” хаһыат босхо тарҕанар уонна нэдиэлэҕэ үстэ тахсар этэ.

Мин ол кэмнэргэ ордук сөбүлээн хапсаҕай уонна мас тардыһыы күрэхтэһиилэригэр сылдьарым. Ол иннинэ көннөрү көрөр, “кыайда-хоттордо” эрэ диир буоллахпына, “Дьулурҕаҥҥа” үлэлиэхпиттэн спортсменнар ааттарын билэттиир, ким ханнык албаһы туттубутун кыралаан быһаарсар буолбутум. Хаҥалас хапсаҕайын, “Көмүс маһы”, ИДьМ хапсаҕайын, Уйбаан Белолюбскай, Анатолий Баишев турнирдарын, “Дыгын оонньууларын” сырдатыыга үлэлээбитим. Ону таһынан норуоттар икки ардыларынааҕы, аан дойдутааҕы таһымнаах көҥүл тустууга, мас тардыһыыга күрэхтэһиилэргэ сылдьан ааттаах, биллэр-көстөр спортсменнары кытта кэпсэтэн, ону хаһыакка суруйбутум. Тустууну көрүөхпүттэн аан дойду таһымнаах Сослан Рамонов уонна Денис Царгуш тустууларын интэриэһиргиибин, кинилэр тустарын матырыйааллары мунньабын. Бу дьонум Дьокуускайга кэлэ сырыттахтарына илэ көрсөн, кэпсэтэн олус үөрбүтүм.

Сахабыт сирин спортсменнарын кытта балай да элбэх интервьюну суруйбутум. Ол курдук, оҕунан ытааччы Степанида Артахиновалыын, марафонец Марфа Троевалыын, тустуук Леонид Спиридоновтыын, мас тардыһыык Дмитрий Поповтуун, многоборец Артем Варданянныын, “Мохсоҕол” спорт кулууптаах Алексей Уваровтыын уо.д.а. кытта кэпсэппитим. Спорду сырдатар суруналыыстары, спорт пропагандистарын эмиэ хаста даҕаны суруйбутум.

“Дьулурҕаҥҥа” үлэлээбит кэммэр биир саамай өйдөнөн хаалбыт түгэннээхпин. Ол саҥа үлэлии сырыттахпына бастакы суруйууларбыттан биирдэстэригэр, Орто Халыматтан Николай Третьяков санаатын суруйан, хайҕаан сурук ыыппыта буолар. Онно олус астыммытым уонна өссө элбэҕи айыах-тутуох санаам күүһүрбүтэ.

2016 сыл бүтүүтэ “Саха сирэ” хаһыат edersaas.ru диэн саайтаммыппыт. Хаһыаты кытта саайты дьүөрэлээн үлэлээн саҕалаабыппыт. Күрэхтэһиилэргэ сылдьан миэстэтиттэн саайтыпытыгар сырдатан иһэрбит, ону үгүс киһи сэҥээрбитэ. Петр Семенович Красноярскайга тиийэн Ярыгин турнирыгар үлэлээбитэ. Онтон репортажтары, ырытыылары, блиц-интервьюлары тута саайтка таһаарбыппытын, 5-6 тыһыынча кэриҥэ киһи биир кэмҥэ киирэн ааҕара. Маннык хабааннаахтык элбэх күрэхтэһиини сырдаппыппыт.

“Дьулурҕаҥҥа” кылгас кэмҥэ да үлэлээтэрбин олус таһаарыылаахтык, бэриниилээхтик үлэлээбитим дии саныыбын. Үлэбин саҥа саҕалаан эрэр киһи билбэтим-көрбөтүм үгүс буоллаҕа, онуоха Петр Семенович биирдэ даҕаны мөхпөккө-эппэккэ барытын сиһилии быһааран биэрэрэ, кэпсиирэ, сүбэлиирэ. Бу кэмҥэ олус элбэх киһини кытта билсибитим, чугас доҕоттордоммутум, үгүс умнуллубат сырыыларга, күрэхтэһиилэргэ сылдьыбытым, чаҕылхай кыайыылары, кыһыылаах хотторуулары илэ көрбүтүм-истибитим.

“Дьулурҕан” ааҕааччыта элбиэн, интэриниэт киэҥ куйаарыгар спорду сырдатар сахалыы соҕотох саайт өссө да үгүс сонуну суруйа турарыгар баҕарабын.

Айтана АММОСОВА, «Саха сирэ» хаһыат edersaas сайтын сүрүннээччитэ, Россия Суруналыыстарын сойууһун чилиэнэ.

Добавить комментарий

Ваш адрес email не будет опубликован. Обязательные поля помечены *