Дьон туһугар…

 

Мин Гоша Татариновтыын 2007 сылтан алтыспыт дьоллоохпун, кини оччолорго спорт тематыгар олус ылсан суруйар кэмэ. Оҕо сылдьан “Юный спартаковец” диэн тустуу саалатыгар дьарыктаммыт буолан, спорду этинэн-хаанынан билиитэ талан ылбыт үлэтигэр туһалыыра өтө көстөрө. Ордук спортсменнары кытта кэпсэтэригэр киһи ону бэлиэтии көрөрө. Республика таһымнаах күрэхтэһиилэргэ үлэлиир редакциятыттан үксүн Гошаны анаан командировкалыыллара. Онно барыах иннинэ доҕорбор киирэ-тахса сырыттахха, Гоша дьэ архивын таһааран олорор буолааччы. Кини эрдэтинэ улахан күрэхтэһиигэ кыттыахтаах спортсменнары үөрэтэрэ, ырытара. Бу санаатахха, күрэхтэһии күүрээннээх, тыҥааһыннаах кэмигэр спортсментан интервью ыларыгар бары өттүнэн бэлэм буолардыы дьаһынар эбитэ. Ол хаачыстыбата биир бэйэбэр туһалаан турар.

Дьэ ол маннык этэ. Боксаҕа Россия чемпионатын иннигэр доҕорбут, коллегабыт Петр Павлов “Дьулурҕан” хаһыатыгар “Кыайыылаахтары таай!” диэн прогноз-конкурс ыытабын диэн сэһэргээтэ. Боксаттан отой тэйиччи киһи, истэн эрэ кэбистим. Дьэ, чемпионаппыт буолуо биир хонук иннинэ Гошаҕа хоһугар киирдим, доҕорум идэтинэн архивын, саҥа сонуннары үөрэтэ олорор. Мин боксердар тустарынан ыйыталаһааччы буоллум, Гоша олус олохтоохтук, дьоһуннаан олорон ырытыытын кэпсээтэ. Мин иһиттим эрэ-истибэтим эрэ, Петр Семеновичка супту киирэн биир тыынынан прогнозпун бичийэн кэбистим. Арай, чемпионат кэннэ Гоша телефоннуур:“Дьулурҕан” хаһыат сүрүн приһын ылбыккын”, — диэн. Мин соһуйуу бөҕө, ол быыһыгар үөрэбин. Тутатына Гошабар махтанабын. Ити курдук Гоша аһаҕас, доҕотторугар үтүө санаалаах этэ.

Манчаары оонньуулара да буоллун, Саха сирин спортивнай оонньуулара да буоллун, пресс-киин биир кэм өрө куугунаан олорооччу. Игорь Платонов статьятын бэлэмнииригэр компьютерын клавиатурата бирээмэ пулемет уочаратынан ытыалыырга гынара, Федор Рахлеев олус кыһамньылаахтык блокнотугар бэлиэтэммитин бичийэрэ. Онтон Коля Бястинов холорук кэлэн ааспытыныы суруйа охсон, күрэхтэһиигэ ойоро. Арай Саша Посельскай аа-дьуо, наҕыллык: “Уолаттар, кытаатабыт, бириэмэ ыгым“, – диирэ иһиллэр. Арай… Доҕорбут Гошабыт иһиллибэт курдуга. Биирдэ эмит чээй иһэ турдаҕына тыл быктарара. Дьэ, ол оннугар, сарсыныгар хаһыатын биир улахан балаһата бүүс-бүтүннүү кини статьялара буолаллара. Хаһан успейдаан суруйбута диэххэ дылы. Гоша ол курдук үлэтигэр бэриниилээҕэ, ылсыбыт дьыалатын түмүгэр тириэрдэрэ.

Михаил Мордовской-Михута.

Добавить комментарий

Ваш адрес email не будет опубликован. Обязательные поля помечены *