Дьокуускай чемпионатыгар – Валерий Керемясов аата иҥэрилиннэ

Көҥүл тустууга Дьокуускай куорат аһаҕас чемпионата – ССРС спордун маастара, Саха Республикатын үтүөлээх тренерэ, Россия физическэй култуураҕа үтүөлээх үлэһитэ Валерий Петрович Керемясов аатынан ыытылынна. Билэргит курдук, Валерий Петрович таптыыр спордун көрүҥэ Сахатын сиригэр, республикабыт киин куоратыгар сайдарын туһугар күүһүн харыстаабакка үлэлээбитэ. Өр сыллар усталарыгар Дьокуускай куорат тустууга хамаандатын ситиһиилээхтик салайан элбэх кыайыылары, ситиһиилэри ситиспитэ.

Бэҕэһээ, сэтинньи 3 күнүгэр “Кыайыы 50 сыла” Спорт дыбарыаһыгар Дьокуускай куорат көҥүл тустууга аһаҕас чемпионата ыытыллан түмүктэннэ. Чемпионат үөрүүлээх аһыллыытыгар Дьокуускай куорат баһылыгын солбуйааччы Е.И. Евсикова, Саха сиригэр көҥүл тустууну төрүттээччилэриттэн биирдэстэрэ, Саха АССР үтүөлээх тренерэ Н.Н. Волков, Саха Республикатын Спорка миниистирин бастакы солбуйааччы С.С. Чердонов, олимпийскай чемпион, Ил Түмэн депутата П.П. Пинигин, олимпийскай призер А.Н. Иванов, Чурапчы улууһун Алаҕар нэһилиэгин баһылыга Нь.Попов, суруналыыс Л.П. Керемясова, Дьокуускай куорат 3 №-дээх спортивнай оскуолатын дириэктэрэ,  куорат тустууга федерациятын толорооччу дириэктэрэ Ф.А. Соловьев, чемпионат кылаабынай судьуйата С.Е. Афанасьев кыттыыны ылан эҕэрдэ тыллары эттилэр.

Евдокия Ивановна Евсикова, Валерий Петровиһы тус билэрин, бииргэ алтыһан үлэлээбитин, кини оҕолорго тустууга тапталы иҥэрбитин, тустуук оҕолорго иккис аҕалара буолбутун аҕынна. Итиэннэ бу чемпионат салгыы В.П. Керемясов аатынан тэриллэн ситиһиилээхтик ыытылла турарыгар баҕарда. Валерий Петрович ыыппыт, үлэлээбит дьыалата салҕана турар диэтэ.

Семен Сергеевич Чердонов бэйэтин этиитигэр, Дьокуускай куорат көҥүл тустууга чемпионата өрүү үрдүк тэрээһиннээхтик ыытылларын, онон республикаҕа спорт бу көрүҥэ сайдыытыгар сүҥкэн оруолу ыларын бэлиэтээтэ. Аны былырыыҥҥыттан ыла улуустарга көҥүл тустуу чемпионаттара сөргүтүллэн ыытыллыбыттарын санатта итиэннэ бу үлэни өссө күүскэ ыытарга ыҥырда.

Николай Николаевич Волков: “Биһиги элбэх улуу бөҕөстөрбүт спорка кыайыыларын чуолаан Дьокуускай куорат чемпионатыттан саҕалаабыттара. Бу күрэхтэһии элбэх күүстээх тустууктары үүннэрэн таһаарбыта. Онон эдэр тустууктар, тренердэр кытаатыҥ! Россия чемпионатыттан 2-3 кыһыл көмүс мэтээли ылар туһугар үлэлиэхтээххит, кыһаныахтаахтык. Билиҥҥи балаһыанньа мөлтөх, биир боруонса мэтээллээхпит. Сотору И.Ярыгин турнира, Россия чемпионата чугаһаатылар. Эрэнэр тустууктарбыт элбэхтэр. Бары бииргэ буолан, түмсэн – Саха сириттэн олимпийскай чемпиону таһаарыаҕыҥ!”, — диэтэ.

Оттон Павел Павлович Пинигин: “Валерий Петрович Керемясовы бары билэҕит. Мин кинини быраатым курдук саныыбын. Хаһан да умнуллубат суолу-ииһи хаалларан барда. Көрөөччүлэр, спорду сэҥээрээччилэр эһиги баар буолаҥҥыт – тустуу тыыннаах. Инники сайдыыга туох нааданый? Тугу да кэрэйбэккэ, бэйэни харыстаммакка киирсиэххитин, тустуоххутун наада. Оччоҕо эрэ сайдыы кэлиэҕэ”, — диэн эдэр спортсменнарга бэйэтин сүбэтин эттэ.

Александр Николаевич Иванов – Валерий Керемясовы эрчийэ сылдьыбытын санатта. Итиэннэ парадтаан турар спортсменнарга туһаайан, спорт историятын билиэхтээхтэрин ыйда. Холобур, бүгүн манна ким аатынан күрэхтэһиигэ кэлэн туралларын, кини кимин-тугун билэ, үөрэтэ сатыахтаарын эттэ, оччоҕо эрэ сайдалларын санатта.

Валерий Петрович Керемясов бииргэ төрөөбүт балта, “Саха” НКИХ биир сүрүн айар үлэһитэ Лена Петровна Керемясова, Дьокуускай куорат тустууга чемпионатыгар В.П. Керемясов аата иҥэриллибитэ улахан кэрэ бэлиэ түгэн буоларын эттэ. Итиэннэ тэрийээччилэргэ махталын тиэртэ.

Керемясовтар төрүт сирдэрин – Чурапчы улууһун Алаҕар нэһилиэгиттэн кэлбит Ньургун Попов тустуу бырааһынньыга саҕаламматынан эҕэрдэлээн туран, Дьокуускай куорат көҥүл тустууга чемпионатыгар Валерий Петрович Керемясов аатын иҥэрбиттэринэн – Дьокуускай куорат физическэй култуураҕа уонна спорка управлениетын начаалынньыга Константин Семенович Бурцевка уонна Дьокуускай куорат 3 №-дээх спортивнай оскуолатын дириэктэрэ Федот Архипович Соловьевка – Махтал суруктары туттарда.

Ити курдук, Татьяна Витальевна Керемясова, кэргэнэ Валерий Петрович аатынан стипендияны – Дьокуускай куорат 3 №-дээх спортивнай оскуолатын тренерэ, Саха Республикатын үтүөлээх тренерэ, көҥүл тустууга бэтэрээннэргэ аан дойду икки төгүллээх чемпиона, быйыл 70 сааһын туолбут Иннокентий Семенович Кочкиҥҥа туттарда.

Дьэ онон, көҥүл тустууга Дьокуускай куорат аһаҕас чемпионатыгар – ССРС спордун маастара, Саха Республикатын үтүөлээх тренерэ, Россия физическэй култуураҕа үтүөлээх үлэһитэ Валерий Петрович Керемясов аата иҥэриллэн, бастакы чемпионат үрдүк тэрээһиннээхтик ыытылынна.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *