Дьокуускай түһүлгэтэ кыайыылаахтары быһаарда

ССРС спордун маастара, Саха сирин үтүөлээх тренерэ Валерий Петрович Керемясов кэриэһигэр көҥүл тустууга эр дьоҥҥо Дьокуускай куорат аһаҕас чемпионата түмүктэннэ. Көбүөргэ 91 бөҕөс тахсан күөн көрүстэ.

Күрэхтэһии – өр кэмҥэ тустууну көрбөтөх спорду таптааччылары сэргэхситтэ диэххэ сөп. “Күөх экранынан” да буоллар, хапсыһыылары көрөн дуоһуйууну ыллыбыт.

Маныаха чемпионат ыытыллыытыгар бастатан туран, Дьокуускай куорат физическэй култуураҕа уонна спорка управлениетыгар (начаалынньык Константин Бурцев) махтаныах тустаахпыт. Маннык уустук кэмҥэ бу күрэхтэһиини тэрийиини кинилэр өссө ааспыт сыл сэтинньи ыйыттан туруорсубуттара уонна ону ситиспиттэрэ. Тэрээһин – бары ирдэбиллэри тутуһан туран, үрдүк таһымнаахтык ыытыллынна диир кыахтаахпыт.

Кыайыылаахтар – тустаах мэтээллэри, грамоталары тэҥэ телевизор, пылесос, сэрээттиир тэрил бириистэринэн наҕараадаланнылар.

Чемпионат кылаабынай судьуйата Станислав Афанасьев биһиэхэ иһитиннэрбитинэн, чемпионат бастыҥ тустуугунан 70 киилэҕэ бастаабыт Петр Павлов ааттанна. Ити курдук, «Эдэр кэскиллээх тустуук» анал бирииһинэн Айтал Уйгуров бэлиэтэннэ. Ону тэҥэ Петр Константинов, Федор Постников, Никита Хабаров, Ньургун Сергин уонна чемпионат бастыҥ судьуйата Виктория Барашкова — Керемясовтар аймах уонна Валерий Петровиһы кытта бииргэ үөрэммиттэр олохтообут анал бириистэринэн наҕараадаланнылар.

Бу күрэхтэһии, Саха сирин эр дьоҥҥо хамаандатыгар, олунньу 12-14 күннэригэр Бурятия киин куоратыгар Улан-Удэҕэ ыытыллар Дальнай Восток федеральнай уокуругун чемпионатыгар бэлэмнэнии чэрчитинэн ыытылынна.

Түһүлгэ түмүк көрдөрүүтэ:

57 кг (12 кыттааччы): 1. Петр Копылов, 2. Алексей Копылов, 3. Любомир Ашеин, Валентин Бурнашев.

61 кг (17): 1. Федор Постников, 2. Айсиэн Винокуров, 3. Дьулустаан Федотов, Михаил Иванов.

65 кг (15): 1. Ньургун Александров, 2. Кирилл Павлов, 3. Семен Владимиров, Дьулусхан Тотонов

70 кг (16): 1. Петр Павлов, 2. Айхан Антонов, 3. Егор Пономарев, Алексей Данилов.

74 кг (9): 1. Виктор Рассадин, 2. Николай Сивцев, 3. Албан Аввакумов, Андрей Винокуров.

79 кг (8): 1. Тимур Николаев, 2. Константин Власов, 3. Заур Алавердов, Стив Попов.

86 кг (10): 1. Герман Устинов, 2. Артур Дьяконов, 3. Алексей Ефимов, Айтал Уйгуров.

92 кг (5): 1. Никита Софронов, 2. Александр Халыев, 3. Арсентий Николаев.

97 кг (5): 1. Ньургун Сергин, 2. Андрей Аронов, 3. Харысхан Николаев.

125 кг (4): 1. Никита Хабаров, 2. Даниил Иванов, 3. Уйусхан Шелковников.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *