Дьокуускай тустууга федерациятын саҥа састааба уонна инники соруктара

Соторутааҕыта Дьокуускай куорат спортивнай тустууга федерациятын саҥа састааба быһаарылынна.

Ол быһыытынан федерация председателинэн – Дьокуускай куорат көҥүл тустууга сүрүн тренерэ, ССРС спордун маастара, Саха Республикатын үтүөлээх тренерэ Прокопий Семенович Иванов, председатели бастакы солбуйааччынан – Саха Республикатын Ил Дарханын уонна Правительствотын олохтоох бэйэни салайыныы боппуруостарыгар департаменын салайааччыта Руслан Михайлович Платонов, председатели солбуйааччыларынан – Дьокуускай куорат дьаһалтатын баһылыгын эбээһинэһин толорооччу Евгений Николаевич Григорьев, “Строительнай” рынок генеральнай дириэктэрэ Иван Иванович Данилов, федерация ревизиялыыр комиссиятын салайааччытынан – Саха Республикатын Конституционнай суутун судьуйата Егор Михайлович Винокуров, федерация толорооччу дириэктэринэн – В.П. Керемясов аатынан спортивнай оскуола тренерэ Вячеслав Александович Кривошапкин, федерация эппиэттиир секретарынан – В.П. Керемясов аатынан спортивнай оскуола дириэктэрэ Василий Василий Уйгуров талылыннылар.

Итини тэҥэ 11 киһиттэн састааптаах Дьокуускай куорат спортивнай тустууга федерациятын чилиэнэ талылынна.

Түгэнинэн туһанан биһиги – Саха Республикатын Ил Дарханын уонна Правительствотын олохтоох бэйэни салайыныы боппуруостарыгар департаменын салайааччыта, Дьокуускай куорат спортивнай тустууга федерациятын председателин бастакы солбуйааччы Руслан Михайлович Платоновтан, федерация саҥа талыллыбыт састаабын үлэтин билиһиннэрэригэр көрдөстүбүт.

-Дьокуускай куорат спортивнай тустууга федерациятын үлэтин кылгастык билиһиннэрдэххэ, СР үтүөлээх тренерэ Прокопий Семенович Иванов көхтөөх көҕүлээһининэн, ааспыт сыл сэтинньи ыйыттан федерация үлэтин сөргүтүөххэ диэн этии киирбитэ. Онно миигин кэлэн үлэлэс диэн ыҥырбыттара. Мин бэйэм спортивнай оскуола тустууга саалатыгар сылдьан хапсаҕайга эрчиллэбин. Ол иһин, бииргэ алтыһар дьонум көрдөһүүлэрин быһа гыммакка, бииргэ үлэлииргэ сөбүлэспитим. Убайдарбын, ытыктабыллаах тренердэри кытта үлэлэһэр күндү түгэн буоллаҕа. Федерация саҥа састаабыгар Прокопий Семенович бэйэтэ председатель, миигин киниэхэ солбуйааччыбын. Өссө, федерация председателин солбуйааччынан үлэлииргэ билигин Дьокуускай куорат дьаһалтатын баһылыгын эбээһинэһин толорооччу Евгений Николаевич Григорьев сөбүлэспитэ.

Урукку сылларга маннык спортивнай федерациялар – куруутун улахан компаниялартан, общественнай түмсүүлэртэн, дьонтон үп-харчы көрдөһөн эрчиллэр түмсүүлэргэ, күрэхтэһиилэргэ барар-кэлэр этилэр. Итинник көстүү бары спортивнай федерацияларга барыларыгар бааллар. Ол гынан баран, биһиги билигин аныгы бэбиэскэҕэ киириэхпитин наада дии саныыбын. Дойду, республика, куорат граннарыгар хайаан даҕаны киирсиэххэ наада диэн, федерация мунньаҕар эппитим. Ону сөбүлэһэннэр, киһи анааннар, билигин үлэлэһэ сылдьабыт. Ону тэҥэ Тулагы, Марха, Хатас, 5 №-дээх ДЮСШ уонна Дьокуускай куорат 25, 21, 33 нүөмэрдээх оскуолаларыгар тустуу саалалара үлэлии тураллар. Онон тохтоон хаалбакка, киин куораппыт аҕыс уокуругар уонна Дьокуускай тулатынааҕы алта бөһүөлэккэ барытыгар база оҥостон үлэлиэхпитин наада.

Ол чэрчитинэн Дьокуускай куорат баһылыгын эбээһинэһин толорооччу Евгений Николаевичка киирэ сылдьыбыппыт. Онно сайыҥҥы спортивнай лааҕыр туһунан, интернат үлэтин туһунан кэпсэтиилэр барбыттара. Күрэхтэһиигэ барыыга-кэлиигэ былааннаах үлэни ыытаммыт, федерацияҕа киирбит дьон бары сүүрүөхпүтүн-көтүөхпүтүн, үлэлиэхпитин наада.

Оттон Евгений Николаевиһы тоҕо өйөөтүгүт диэтэххэ, кини аныгылыы көрүүлээх, бэйэтэ спортсмен, бэйэтин характерынан, түргэн-тарҕан туттуутунан уонна дьыаланы суһаллык хамсата охсор баҕалааҕынан – федерация салалтатын сөбүлэппитэ. Итиэннэ салгыы куорат хас биирдии оскуолаларыгар, уокуруктарыгар, пригородтарга – спордунан, физкультуранан уонна чуолаан көҥүл тустуунан дьарыктаныыны сайыннарарга үлэлиэхпит диэн эппитэ. Евгений Николаевич тылын-өһүн, инники соруктарын федерация дьоно астыммыппыт. Онон биһиги – Дьокуускай куорат спортивнай тустууга федерацията бары биир киһи курдук, буолаары турар быыбарга Евгений Николаевич Григорьевы өйүүбүт!

Петр ПАВЛОВ.          

Добавить комментарий

Ваш адрес email не будет опубликован. Обязательные поля помечены *