Дьокуускай саахымакка чемпионатын түмүгэ

Республикатааҕы Дуобат-саахымат киинигэр Дьокуускай куорат саахымакка биирдиилээн бастыыр иһин чемпионата ыытыллан түмүктэннэ. Чемпионакка, сааһынан араарыллыбыт биэс бөлөххө барыта 71 саахыматчыт кыттыыны ылла.

Кылаабынай судьуйа Афанасий Павлов быһаарыытынан, түмүккэ эр дьон сүрүн бөлөҕөр Руслан Пахомов 8 очукуолаах кыайыылааҕынан таҕыста. Оттон Нариман Мустафин уонна Дмитрий Мосорин 6,5-тии очукуону ылан тэҥнэһэн таҕыстылар. Ол эрээри, оонньуу хаачыстыбатынан Мустафин иккистээтэ, Мосорин үһүстээтэ.

Кинилэр кэннилэриттэн 6-лыы очукуолаах Николай Капитонов уонна Вадим Горлов туһааннааҕынан төрдүс-бэһис миэстэлэри үллэһиннилэр.

Бэтэрээн эр дьоҥҥо Александр Кравченко бастаата, Александр Жу иккистээтэ уонна Николай Николаев үһүстээтэ.

Кыргыттар бөлөхтөрүгэр кыайыылааҕынан Таня Номтоева таҕыста. Настя Андреева иккис буолла. Оттон Регина Саввина үһүс миэстэлэннэ.

Уолаттарга Влад Жирков бастакы, Арсений Чумаевскай иккис, Никита Поисеев үһүс миэстэлэри үллэһиннилэр.

Оттон дьахталларга Александра Прокопьева чемпион үрдүк аатын ылла, Александра Жегусова иккис буолла, Лариса Березкина үһүстээтэ.

Кыайыылаахтар уонна миэстэлэспиттэр өйдөбүнньүк бириистэринэн, мэтээллэринэн, кубоктарынан  уонна грамоталарынан наҕараадаланнылар. Кинилэргэ наҕараадалары республикатааҕы Дуобат-саахымат киинин үлэһитэ, кылаабынай судьуйа солбуйааччыта, спорт маастара Дмитрий Егоров туттарда.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *