Дьааҥыга тустуу бырааһынньыга

Бэйэтин төрөөбүт дойдутун дьиҥнээх патриота, Дьааҥы улууһун Бочуоттаах гражданина, Саха АССР спорка кэмитиэтин бэрэссэдээтэлин солбуйааччынан, Ил Түмэн аппараатын салайааччытын солбуйааччынан үлэлээбит Святослав Сергеевич Габышев туруорсуутунан, дьаһалынан, үбүлээһининэн – Дьааҥы көҥүл тустуутун 60,  Верхоянскай куоракка оҕо спорт оскуолата аһыллыбыта 50 сылларынан бу күннэргэ “Полюс холода” турнир ыытылынна.

Турнирга бочуоттаах ыалдьыт быһыытынан Святослав Сергеевич кэргэнэ, Ил Түмэн депутата, СР үөрэххэ миниистирин солбуйааччы Феодосия Васильевна Габышева, кыыстара Яна Святославовна, Саха сирин аатырбыт спортивнай комментатора Александр Васильев-Көрдүгэн, спорду тэрийээччи, көҕүлээччи Михаил Егорович Друзьянов, көҥүл тустууга ССРС спордун маастара Михаил Васильевич Ноговицын, Дьааҥы улууһун бастакы баһылыга Иван Иванович Горохов, Константин Николаевич Стручков, хапсаҕай, тустуу маастардара, Дьааҥы уолаттара: Юрий Старостин, Виталий Иванов, Святослав Татаринов, Василий Стручков, Алексей Эверстов, Амма улууһун делегацията, уо.д.а. элбэх аатырбыт спортсменнар, спорт салайааччылара кытыннылар.

Күрэхтэһии кэмигэр СР үтүөлээх тренерэ, Дьааҥы Бочуоттаах гражданина, элбэх кинигэ ааптара Петр Васильевич Портнягин “Дьааҥы хапсаҕайга маастардара” диэн саҥа кинигэтин сүрэхтэниитэ буолла.

Святослав Сергеевич Габышев кэриэһигэр уолаттар көҥүл тустууга оройуоннааҕы күрэхтэһиилэригэр 12 хамаанданы тэҥэ, ыаллыы сытар Эбээн Бытантай оройуонуттан барыта 125 эдэр бөҕөс көбүөргэ күөн көрүстэ. Күрэхтэһии кылаабынай судьуйатынан Россия үөрэхтээһиҥҥэ бочуоттаах үлэһитэ Василий Васильевич Ноговицын, кылаабынай секретарынан Саха Республикатын физическэй култуураҕа уонна спорка туйгуна Иван Иванович Иванов үтүө суобастаахтык үлэлээтилэр. Күрэхтэһии түмүктэниитэ Петр Васильевич Портнягин төрөппүт уола Алексей Портнягин кэриэһигэр 50 кг диэри ыйааһыҥҥа хапсаҕайга муҥутуур кыайыылааҕы быһаарар түһүлгэ тэрийдэ. Кыайыылаахха 5, иккис миэстэлээххэ 3 тыһыынча солк. бириистэри туттарда.

СР спортивнай тустууга федерациятын 1-кы вице-президенэ, Ил Түмэн депутата, көҥүл тустууга аан дойду икки төгүллээх чемпиона, спорт үтүөлээх маастара Виктор Лебедев оҕо тустуутун өйөөн, Дьааҥы түһүлгэтигэр бэйэтин аатыттан өйдөбүнньүк бириистэри анаабыта – улахан кэрэхсэбили ылла.

Оттон хапсаҕай түһүлгэтин түмүгэ маннык буолла: 70 кг – 1. Василий Стручков, 2. Христофор Потапов, 3. Айсен Потапов, 80 кг – 1. Дьулус Попов, 2. Илья Юмшанов, 3. Станислав Баишев, 80-тан үөһэ кг – 1. Юрий Старостин, 2. Алексей Мигалкин, 3. Виталий Иванов. Улахан дьоҥҥо бастакы миэстэ иһин 30000, иккис миэстэлээххэ 20000 уонна үһүс буолбуттарга 10000 солк. харчынан бириистэр туттарылыннылар. Түһүлгэ муҥутуур кыайыылааҕа 100000 солкуобайынан наҕараадаланна. Харчынан бириистэри, С.С. Габышев туруорбут бириистэрин Ф.В. Габышева уонна кини кыыһа Яна Святославовна, С.С. Габышев бииргэ төрөөбүт балта Наталья Сергеевна Габышева туттардылар. Манна даҕатан эттэххэ, түһүлгэ кэмигэр көҥүл тустууга РФ, хапсаҕайга СР спортарын маастара Юрий Старостины чиэстээһин тэрилиннэ. Киниэхэ салгыы төрөөбүт дойдутун дорҕоонноохтук ааттата турарыгар баҕардылар, элбэх үтүө тыллар этилиннилэр, үгүс сыаналаах бэлэхтэр туттарылыннылар.

Верхоянскай куоракка оҕо спорт оскуолата аһыллыбыта 50 сылынан, оскуола бастакы салайааччыта, хапсаҕай маастара, кэлин Саха АССР үтүөлээх тренерэ буолбут Николай Михайлович Давыдов аатын үйэтитэн – өйдөбүнньүк бэлиэ туруорулунна уонна оскуолаҕа кини аатын иҥэрилиннэ.

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *