«Дыгын оонньуутун» кыттыылаахтара бары билиннилэр

«Триумф» Спорка бэлэмнэнии киинигэр национальнай многоборьеҕа «Дыгын оонньууларын» иккис сүүмэрдиир күрэхтэһиитэ ыытыллан түмүктэннэ. Түһүлгэҕэ барыта 23 боотур тахсан күөн көрүстэ. Кинилэр ортолоругар урукку сылларга «Дыгын оонньуутугар» ситиһиилээхтик кытта сылдьыбыт спортсменнар эмиэ бааллара.

Икки күннээх күрэхтэһии түмүгүнэн, «Боотур» спортивнай кулуупка эрчиллэр Бүлүү ыччата, 28 саастаах Дмитрий Петров 50 очукуону ылан, эрэллээхтик бастаата. Кини күрэхтэһии былаһын тухары бастыҥнарга чугас сылдьан баран, бүтэһик түһүмэххэ – таас көтөҕүүтүгэр бастакы миэстэни ылан, уопсай түмүккэ инники таҕыста. Иккис миэстэни, кыайыылаахтан биир эрэ очукуонан хаалбыт, былырыыҥҥы оонньууларга кыттан үчүгэй өйдөбүлү хаалларбыт эмиэ «Боотурга» эрчиллэр Уус Алдан уола, 20 саастаах Никита Новгородов ылла. Кини тутум эргииригэр бастаата, оҕунан ытыыга үһүс буолла. Үһүс бириистээх миэстэҕэ 52 очукуолаах «Боотур» кулуупка дьарыктанар, 19 саастаах Айсен Елисеев (Дьокуускай) тахсыбыта соһуччу буолла. Эдэр боотур бары көрүҥнэргэ биир тэҥник кыттыбытын бэлиэтиэххэ сөп.

Ылан көрдөххө, “Дыгын оонньуутун” сэттэ төгүллээх муҥутуур кыайыылааҕа Уйбаан Белолюбскай сахалыы многоборьеҕа «Боотур» спортивнай кулуубу аһан үлэлэтиэҕиттэн, эдэр уолаттар ситиһиилээхтик кытталлар. Ону, буолан ааспыт күрэхтэһии арылхайдык көрдөрдө. Киһи эрэ барыта кэтэспит, опыттаах спортсменнара: Айсен Семенов, Иннокентий Колесов, Петр Старостин, Борис Сдвижков эдэрдэргэ сабырыйтаран, сыалларын-соруктарын ситиспэтилэр.

Дьэ, онон, Дмитрий Петров, Никита Новгородов, Айсен Елисеев – сайын Үс Хатыҥҥа Туймаада ыһыаҕар ыытыллыахтаах «Дыгын оонньууларын» быһаарыылаах түһүлгэтигэр кыттар быраабы ыллылар. Манна сыһыары тутан эттэххэ, бу иннинэ оонньууларга кыттар быраабы Леонид Филиппов, Вячеслав Дьяконов, Дьулустаан Ноговицын, Николай Матаннанов, Егор Филиппов, Тимофей Большаков, Артем Варданян, Владимир Федоров, Павел Друзьянов ылбыттара.

Биир үөрүүлээх сонунунан «Прогресс» тэрилтэ дириэктэрэ Алексей Пинигин, быйылгы «Дыгын оонньууларын» муҥутуур кыайыылааҕар 1 мөлүйүөн харчыны сүрүн бириис быһыытынан туттарарга этиитэ буолла. Итинэн, 2020 сыл түмүгүнэн спорка бастыҥ меценатынан ааттаммыт Алексей Семенович Пинигин, биһиги саамай сөбүлүүр күрэхтэһиибит генеральнай спонсора буоларын итэҕэттэ.

Санатан эттэххэ, «Дыгын оонньууларын» былырыыҥҥы муҥутуур кыайыылааҕа Леонид Филиппов күрэхтэһии бүппүтүн кэнниттэн тута А.С. Пинигинтэн 1 мөл. сертификаты туппута.

Спорду, спортсменнары өйүүр киһибитигэр улахан Махтал!

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *