«Дыгын оонньуутугар» сүүмэрдээһин: Үс бастыҥынан кимнээх буолуохтарай?

Бу субуота, өрөбүл күннэргэ «Триумф» Спорка бэлэмнэнии киинигэр национальнай многоборьеҕа «Дыгын оонньууларын» иккис сүүмэрдиир күрэхтэһиитэ ыытыллар. Күрэхтэһии Спорт министиэристибэтин, национальнай многоборье федерациятын, Дьокуускай куорат физическэй культураҕа уонна спорка управлениетын көҕүлээһиннэринэн тэриллэр.

Бырагыраама быһыытынан бастакы күн боотурдар «Үс төгүл үс» ыстаныыга, тутум эргииргэ, мас тардыһыыга күөн көрсүөхтэрэ.

Оттон иккис күн – оҕунан ытыы, сүүрүү, хапсаҕай уонна тааһы көтөҕүүгэ ким бастыҥын быһаарсыахтара.

Күрэхтэһии кыайыылаахтара уонна иккис-үһүс миэстэлээхтэрэ туһааннаах грамоталарынан, мэтээллэринэн уонна бириистэринэн наҕараадаланыахтара.

Санатан эттэххэ, аны сайын Үс Хатыҥҥа ыытыллыахтаах Туймаада ыһыаҕын кэмигэр «Дыгын оонньууларын» бүтэһик быһаарыылаах түһүлгэтигэр билинҥитэ тоҕус боотур: Егор Филиппов, Леонид Филиппов, Вячеслав Дьяконов, Дьулустаан Ноговицын, Николай Матаннанов, Тимофей Большаков, Артем Варданян, Павел Друзьянов, Владимир Федоров кыттар быраабы ылбыттара.

Оттон билиҥҥи түмүк хайдах буолуой диэтэххэ, кулун тутар бүтүүтүгэр «Дохсуҥҥа» ыытыллыбыт сүүмэрдээһиҥҥэ оҕунан ытыыга бастаабыт Айсен Семенов (Өлөөн), тутум эргииригэр кыайбыт, оҕунан ытыыга иккис буолбут Никита Новгородов ((Уус Алдан), хапсаҕайга уонна таас көтөҕүүтүгэр тэҥнээҕин булбатах Дмитрий Петров (Бүлүү) уонна биир тэҥ күүстээхтик кыттыбыт Сергей Гоголев (Нам) сүрүн миэстэ иһин киирсэллэрэ буолуо диэн сылыктааһын баар.

Онон бүтэһик түһүмэххэ үс бастыҥ көрдөрүүлээх спортсмен талыллыа. Ковид дьаҥа киэҥник тарҕамматын инниттэн, Роспотребнадзор ирдэбилинэн, күрэхтэһии көрөөччүтэ суох ыытыллар. Сүүмэрдиир күрэхтэһии Ютуб-каналынан сырдатыллыа, көрдөрүллүө.

«Дьулурҕан».

Добавить комментарий

Ваш адрес email не будет опубликован. Обязательные поля помечены *