Дыгын оонньуута: Ханнык улуус ордук элбэх мэтээллээҕий?

Бу күннэргэ социальнай сеттэргэ Дыгын оонньуутун кыайыылаахтарын уонна призердарын испииһэгэ таһаарыллан, ватсаап эйгэтигэр күүлэйдии сылдьар. Ону мин интэриэскэ, бу күрэхтэһииттэн ханнык улуус спортсменнара ордук элбэх мэтээли ылбыттарын ааҕа сатаатым. Ол эрээри, Петр Варламов киэнигэр буккуур таҕыста.

Кини ханнык улуустан кыттан, үс төгүл үһүс миэстэни ылбытыгар. Ол испииһэккэ Петр Варламов биирдэ Намтан, иккитэ Мэҥэ Хаҥаластан диэн суруллубут. Онон бэйэбит бөлөхпүт иһигэр мөккүөр үөскээбитэ. Дыгын оонньуутун кыайыылааҕа буола сылдьыбыт биир дойдулааҕым Юрий Эверстовтан ыйыппыппар: “Варламов хаһан да Намтан киирсибэтэҕэ”, — диэн чуолкайдаата.

Дьэ, ону бүгүн Петр Николаевичка бэйэтигэр эрийэн, быһаарыстым. Кини үс төгүл Уус Алдантан киирсэн үһүс миэстэ буола сылдьыбыт эбит. Онон мин ааҕыыбынан, Дыгын оонньууларыгар чемпион уонна призер аатыгар 14 оройуон боотурдара тиксибиттэр. Саамай элбэх чемпионнаах Нам – аҕыс, Уус Алдан – сэттэ, Чурапчы, Хаҥалас – түөртүү, Үөһээ Бүлүү, Амма – биирдии муҥутуур чемпионнаахтар.

Аны, саҥа үйэҕэ үктэнэн баран, “Дыгын оонньуутугар” 2015 с. эрэ кыайыылаахха массыына бэриллибэтэх – Алексей Кутуковка (Нам).

Дьэ онон, “Дыгын оонньуутугар” бу күҥҥэ диэри ханнык улуус спортсменнара бастакы, иккис, үһүс миэстэлэри ыла сылдьыбыттарын ааҕан көрбүтүм, маннык буолан таҕыста:

Нам (8-5-4) = 17

Уус Алдан (7-6-4) = 17

Чурапчы (4-2-0) = 6

Хаҥалас (4-0-1) = 5

Амма (1-0-2) = 3

Үөһээ Бүлүү (1-1-4) = 6

Эдьигээн (0-0-3) = 3

Таатта (0-2-0) = 2

Нерюнгри (0-1-0) = 1

Мэҥэ Хаҥалас (0-2-2) = 4

Муома (0-0-3) = 3

Бүлүү (0-2-0) = 2

Сунтаар (0-2-2) = 4

Горнай (0-1-1) = 2.

Дьэ, быйыл ханнык улуус боотура кыайыы өрөгөйүн билэр?

Валерий ШЕЛКОВНИКОВ, спорду сэҥээрээччи.

Нам, Хатырык.

Редакцияттан: Валерий Михайлович, интэриэһинэй статистикаҥ иһин махтал! Көннөрөн биэрдэххэ, Горнай улууһуттан төрүттээх Уус Алдан күтүөтэ Петр Варламов “Дыгын оонньуутугар” үстэ буолбакка, иккитэ үһүс буола сылдьыбыта (1996, 1998 сыллардаахха). Оттон кырдьык, ити эрдэ оҥоһуллубут испииһэккэ кинини 2002 сыллаахха эмиэ үһүс диэн суруйбуттар. Итиннэ Үөһээ Бүлүүттэн Александр Кузнецов үһүстээбитэ.

Добавить комментарий

Ваш адрес email не будет опубликован. Обязательные поля помечены *