“Дыгын оонньуулара” – “Туймаада” стадиоҥҥа

Ковид дьаҥынан сибээстээн “Туймаада ыһыаҕа-2021” быйыл тэриллибэт буолла. Ол эрээри, ыһыах сүрүн тэрээһинэ – сахалыы многоборьеҕа “Дыгын оонньуулара” буолар буоллулар.

Ол курдук, бу, сыл биир саамай улахан кэтэһиилээх күрэхтэһиитин өрүү бэлэмнээн, тэрийэн ыытар Дьокуускайдааҕы физическэй култуура уонна спорт управлениетын начаалынньыга Константин Бурцев иһитиннэрбитинэн, “Дыгын оонньуулара” бэс ыйын 26-27 күннэригэр “Туймаада” стадиоҥҥа ыытыллаллара быһаарылынна. Биллэр биричиинэнэн, күрэхтэһии көрөөччүтэ суох буолар.

“Дыгын оонньууларын-2021” кыттыылаахтара: Леонид Филиппов (Амма), Вячеслав Дьяконов (Нам), Дьулустаан Ноговицын (Горнай), Николай Матаннанов (Таатта), Егор Филиппов (Хаҥалас), Тимофей Большаков (Сунтаар), Артем Варданян (Нам), Владимир Федоров (Ньурба), Павел Друзьянов (Чурапчы), Дмитрий Петров (Бүлүү), Никита Новгородов (Уус Алдан), Айсен Елисеев (Дьокуускай). Көрөргүт курдук, 12 боотуртан – биэһэ “Дыгын оонньууларыгар” бастакытын холонор.

Күрэхтэһии кылаабынай судьуйатынан Дмитрий Шарин, кылаабынай секретарынан Василий Уйгуров үлэлиэхтэрэ.

Санатан эттэххэ, “Дыгын оонньууларын” кыайыылааҕа сүрүн бириис быһыытынан “Прогресс” (салайааччы Алексей Семенович Пинигин) тэрилтэ аатыттан – 1 мөлүйүөнү ылыаҕа. Иккис миэстэҕэ тахсыбыт боотур Дьокуускай куорат дьаһалтата олохтообут – квадроцикл күлүүһүн тутуоҕа, оттон үһүс миэстэлээх киһи Государственнай Дума депутата Гаврил Павлович Парахин аатыттан мотоциклынан наҕараадаланыаҕа.

Күрэхтэһиини бастакы күнэ субуотаҕа 16:00 чаастан саҕаланан, үс көрүҥҥэ ыытыллыаҕа, оттон өрөбүлгэ күнүс 12:00 чаастан хаалбыт түөрт көрүҥҥэ күүстээхтэр уонна муҥутуур кыайыылаах быһаарыллыахтара.

“Дыгын оонньууларын” сытыы киирсиилэрин “Саха” национальнай көрдөрөр-иһитиннэрэр компания телевидениенан быһа көрдөрүөҕэ.

«Дьулурҕан».

Добавить комментарий

Ваш адрес email не будет опубликован. Обязательные поля помечены *