«Дыгын оонньуулара» сүрэхтэннилэр

Бүгүн, атырдьах ыйын 28 күнүгэр Бэчээт дьиэтин Пресс-киинигэр күн сирин саҥа көрбүт “Дыгын оонньуулара” кинигэ сүрэхтэниитэ ыытылынна. Кинигэни эрдэ иһитиннэрбиппит курдук, суруналыыс Родион Кривогорницын хомуйан бэчээккэ бэлэмнээн таһаарда. Киниэхэ маннык үлэни бэчээттээн таһаарарга өй укпут киһинэн спорду, физическэй култуураны ахсаабакка тарҕатааччы Михаил Егорович Друзьянов буолар.

Кэрэ бэлиэ түгэҥҥэ, дьоҥҥо-сэргэҥэ киэҥ биһирэбили ылбыт “Дыгын оонньууларын” сыллата тэрийэн ыытар Дьокуускай куорат спорка уонна физическэй култуураҕа управлениетын начаалынньыга Константин Бурцев, араас кэмнэргэ “Дыгын оонньууларын” кыайыылаахтарынан тахсыбыт: Иннокентий Макаров, Николай Дьяконов, Иван Белолюбскай, Любомир Николаев, Петр Старостин, “Дыгын оонньууларын” бастакы сылларын кэпсээн-ипсээн ыыппыт спорду сырдатааччы Александр Васильев-Көрдүгэн, “Дыгын оонньууларын” кыттыылаахтара: Саха сирин үтүөлээх тренерэ Петр Давыдов, Марк Харлампьев, Владимир Шарин, Антон Тойтонов уо.д.а. кыттыыны ылан, маннык бэртээхэй кинигэни оҥорон таһаарбыт ааптардарга махтаннылар, саха төрүт оонньуутун инники кэскилин торумнастылар.

Дьэ, кырдьык, саха дьонун-сэргэтин улахан биһирэбилин ылбыт “Дыгын оонньуулара” саха төрүт көрүҥнэригэр күрэхтэһии 1995 сылтан ыла хайдах-туох ыытыллыбыта, кимнээх бастаабыттара, миэстэлэспиттэрэ барыта биир кинигэҕэ түмүллэн, этэргэ дылы, ыйынньык быһыытынан оҥоһуллан тахсыбыта – спорду таптааччылары кэрэхсэтиэ дии саныыбын. Кинигэ элбэх сэдэх, өҥнөөх хаартыскаларынан киэргэтиллэн – сиэдэрэй көрүҥнэммит. Манна сыһыары тутан эттэххэ, кинигэ “Арктик капитал” ХЭО сакааһынан 500 ахсаанынан Новосибирскайга бэчээттэнэн таҕыста.

Кинигэҕэ “Спортивная Якутия”, “Спорт Якутии”, “Саха сирэ”, “Дьулурҕан”, “Эхо недели” хаһыаттар ыстатыйалара, республика биллиилээх фотогравтарын хаартыскаҕа түһэриилэрэ киирдилэр.

Ааҕааччылар, Борис Винокуров хомуйан оҥорбут “Дыгын оонньууларын” кыайыылаахтарын таблицатын сэҥээриэхтэрэ. Манна, 1995 сылтан саҕалаан “Дыгын оонньууларын” биирдиилээн көрүҥнэринэн кыайыылаахтара уонна призердара бука бары суруллубуттар.

“Дыгын оонньуулара” кинигэни Бэчээт дьиэтин киоскатыттан атыылаһыаххытын сөп.

Добавить комментарий

Ваш адрес email не будет опубликован.