Дуоскаларыгар кыайбыттар өрөгөй биһирэбилинэн бэлиэтэннилэр

Кэбээйи улууһугар оскуола оҕолорун икки ардыларыгар уолаттар уонна кыргыттар ортолоругар дуобакка бастыыр күрэхтэһии буолан ааста. Барыта 52 кыттааччы оонньоото.

Сүрүн күрэхтэһиилэринэн, хамаанданан уонна туһааннаах оонньообут дуоскаларынан бастыыр иһин киирсии буолла. Манна сэттэ нэһилиэк оскуолаларыттан (Кэбээйи, Сангаар, Тыайа, Лүксүгүн, Сииттэ, Арыктаах, Куокуй) аҕыс хамаанда күөн көрүстэ.

Хамаандалар кыттар оонньооччуларын састааптара:

— алын сүһүөх кылаас оҕолоругар уол-кыыс,

— орто кэрдиис үөрэнээччилэргэ уол-кыыс,

— улахан  саастаах үөрэнээччилэргэ уол-кыыс.

Хамаандалар хас биирдии чилиэннэрэ ситиһиилээхтик дуобаттыыллара күрэхтэһии саҕаланыаҕыттан бүтүөр диэри тыҥааһыннаах буолла. Дуоскаларынан Сангаартан биэс, Кэбээйиттэн уопсайа аҕыс, Лүксүгүнтэн икки, Куокуйтан үс оҕо бириистээх миэстэлэргэ тигистилэр. Күрэхтэһии түмүгүнэн ситиһиилээхтик оонньообут оҕолорго тустаах разрядтар иҥэриллиэхтэрэ.

Бастакы миэстэни Сангаар хамаандата, 32 очкону хомуйан ылла. Биир очкону мүччү туттаран, 31 очколаах Кэбээйи бастакы хамаандата иккис миэстэҕэ таҕыста. Үһүс миэстэҕэ 27 очколаах Кэбээйи иккис хамаандата буолла.

Хамаанданан буолбут күрэхтэһиигэ дуоскаларыгар кыайбыттар уонна миэстэлэспиттэр пьедестал үрдүгэр туран, өрөгөй биһирэбилин ыллылар.

Кыра саастаах кыргыттарга: 1. Кобякова Оля, 2. Семёнова Сандаара, 3. Моркан Анюта.

Кыргыттарга: 1. Халгаева Лина, 2. Дьяконова Виолетта, 3. Кобякова Лиана.

Кыра уолаттарга: 1. Завгородний Альберт, 2. Софронеев Влад, 3. Игнатьев Петя.

Уолаттарга: 1. Дьяконов Андрей, 2. Софронов Эльдар, 3. Егоров Марсель.

Түмүккэ, Саха сирин дуобакка федерациятын аатыттан – дуобат сайдыытыгар өйөбүллэрин, тэрээһин үлэлэрин көхтөөхтүк оҥорбуттарын иһин, Кэбээйи улууһун физкультураҕа уонна спорка управлениетын начальнигар Алексей Нимаевич Сыроватскайга, Е.Е. Эверстов аатынан Кэбээйи орто оскуолатын дириэктэригэр Анна Егоровна Обутоваҕа, Кэбээйи нэһилиэгин баһылыгар Андрей Николаевич Кобяковка  улахан махталбытын тиэрдэбит!

Гаврил ВИНОКУРОВ, күрэхтэһии кылаабынай судьуйата, Республикатааҕы Дуобат-саахымат киинин инструктора.

Добавить комментарий

Ваш адрес email не будет опубликован. Обязательные поля помечены *