Дуобат чөмпүйэнээтигэр оҕолорбут ситиһиилээхтик кытыннылар

2010-2011 сс. уонна 2012 с. төрөөбүт, онтон алын саастаах оҕолорго 64 харахтаах дуобакка Аан дойдуга бастыыр иһин күрэхтэһии Турцияҕа Кушадасы куоракка алтынньы 4-14 күннэригэр буолан ааста.

Бу улахан таһымнаах күрэхтэһиигэ биһиги улууспутуттан Покровскай куорат 3-дээх орто оскуолатын 2-с кылааһын үөрэнээччитэ Олег Винокуров уонна Уулаах Аан А.И. Притузов аатынан орто оскуолатын 3-с кылааһын үөрэнээччитэ Уран Белоусов ситиһиилээхтик кыттан, кыайан-хотон кэллилэр. Кинилэри оҕо уһуйааныттан саҕалаан, дуобат умсулҕанаах хонуутугар үөрэппит-такайбыт киһилэрэ, Хаҥаластааҕы Оҕо спортивнай оскуолатын үрдүкү категориялаах преподавателэ, Саха Өрөспүүбүлүкэтин үөрэҕириитин туйгуна Владимир Иванов илдьэ сырытта.

Уон хонук устата ыытыллыбыт күрэхтэһиигэ, оонньуур бөлөхтөрүгэр 14 сытыы, булугас өйдөөх бастыҥтан бастыҥнар кииристилэр.

«Чаҕылҕаныы оонньооһун» бырагыраамматыгар Олег Винокуров – 1-кы, «Түргэн оонньууга» Уран Белоусов – 2-с, онтон Олег Винокуров – 3-с, «Классическай оонньуу» бырагыраамматыгар Олег Винокуров – 2-с  миэстэлэри ылары ситистилэр.

Билиҥҥи Аан дойду үрдүнэн коронавирус дьаҥа муҥутаан турар кэмигэр, бары ирдэбили тутуһан (тас дойдуга тутуһуннараллар да эбит) ситиһиилээхтик кыттыбыт оҕолорбутугар уонна салайааччыларыгар, үтүө санаалаах дьоммут спорт интеллектуальнай көрүҥнэригэр федерацията (Родион Кононов, Юрий Яковлев), NHZ Group Нөмүгүтээҕи килиэп собуотун генеральнай дириэктэрэ Вячеслав Нестеров, улуустааҕы үөрэх салаатын идэлээх сойуустарын бэрэссэдээтэлэ Валерий Семенов, Покровскай куорат 3-дээх орто оскуолатын дириэктэрэ Владислав Капитонов айан-сырыы ороскуотун уйуммуттара, өйөөбүттэрэ уонна көмөлөспүттэрэ, Аҕа дойдуга бэриниилээх буолуу сылыгар өссө дьоһун суолталаах.

Уйбаан УЙГУУРАП.

Хаҥалас.

Добавить комментарий

Ваш адрес email не будет опубликован. Обязательные поля помечены *