Дуобат бэстибээлэ түмүктэннэ

Ааспыт өрөбүл күннэргэ Республикатааҕы Дуобат, саахымат киинигэр дуобат бэстибээлэ ыытыллан түмүктэннэ. Бэстибээлгэ 11 улуустан уонна Дьокуускай куораттан 115 кыттааччы оонньоото. Ол курдук, нуучча дуобатыгар – 63, оттон 100 харахтаах дуобакка – 52 киһи кытынна.

Түмүккэ, 64 харахтаах дуобакка эр дьоҥҥо Руслан Колодезников (Горнай), Василий Прокопьев (Нам), Николай Гермогенов (Таатта, ХИФУ) 7,5-дыы тэҥ очукуону хомуйдулар уонна хаачыстыбанан миэстэлэри, туһааннааҕынан хайдах бэрээдэгинэн суруллубуттарын курдук ыллылар. Дьахталларга Уйгулана Варламова (Амма, ХИФУ) бастаата, Мария Павлова (Дьокуускай, ХИФУ) иккистээтэ.

Оттон уолаттарга Архан Титов (Чурапчы), кыргыттарга Эмма Софронова (Нам) үчүгэй көрдөрүүнү ситистилэр. Бэтэрээн-эр дьоҥҥо Александр Назаров (Дьокуускай) тэҥнээҕин булбата. Иккис-үһүс миэстэлэри Егор Дьяконов, Михаил Копырин (иккиэн – Уус Алдантан) ыллылар.

Оттон 100 харахтаах дуобакка Николай Гуляев (Таатта), Айсен Андреев (Чурапчы), Антон Пермяков (Амма) үс бастакы миэстэни үллэһиннилэр. Дьахталларга Ксения Нахова (Чурапчы) бастаата, Ангелина Попова (Чурапчы) иккистээтэ, Валерия Карманова (Дьокуускай) үһүстээтэ.

Дуобат бу көрүҥэр кыргыттарга Тунаара Федорова уонна Алексей Большаков (иккиэн – Дьокуускайтан) кыайдылар.

Бэтэрээн-эр дьоҥҥо Иннокентий Ефимов (Дьокуускай), Алексей Герасимов (Дьокуускай), Александр Соломонов (Хаҥалас) үс бастакы миэстэни ыллылар.

Спорт бу көрүҥэр өссө биир үөрүүлээх түгэнинэн, биһиги эдэр дуобатчыттарбыт ситиһиилэрэ буолла. 100 харахтаах дуобакка эдэрдэргэ аан дойдуга хамаанданан бастыыр иһин күрэхтэһиигэ Россия хамаандата бастакы миэстэни ылла. Бастакы дуоскаҕа Руфина Аюпова (Башкортостан), иккис уонна үһүс дуоскаларга Алена Большакова, Сандаара Апросимова оонньоотулар. Иккис миэстэҕэ Беларусь, үһүскэ Кытай хамаандалара таҕыстылар. Дуобатчыттарбытын эҕэрдэлиэҕиҥ!

Бу туһунан “Дьулурҕан” сайтка, Дуобат-саахымат республикатааҕы киинин инструктора Гаврил Петрович Винокуров иһитиннэрдэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *