Европа-Америка: Ханнык континент кыайыай?

Дуобат аан дойдутааҕы федерациятын (ФМЖД) көҕүлээһининэн 100 харахтаах дуобакка Америка уонна Европа континеннарын сүүмэрдэммит хамаандаларын онлайн-матчтара үгэннээн ыытылла турар. Бу күҥҥэ диэри номнуо түөрт түһүмэх түмүктэннэ.

Бэҕэһээ иһитиннэрбиппит курдук, Европа хамаандатын састаабыгар киллэриллибит биир дойдулаахпыт, международнай гроссмейстер Матрена Ноговицына бастакы киирсиитигэр Доминиканскай Республика дуобатчытыгар хотторон кэбиспитэ. Оттон бэҕэһээ-бүгүн, регламент быһыытынан үс түһүмэх утуу-субуу ыытылынна. Ол курдук, иккис түһүмэххэ Матрена илэ бодотун тардынан оонньоон, канадец Шанг Вону кыайан, балаһыанньатын тупсарда. Үһүс түһүмэххэ эмиэ канадец Кейта Солейманены кытта оонньоото. Манна, тэҥнэһии буолла. Итиэннэ төрдүс түһүмэххэ АХШ-тан кыттар Евгений Скляровы кытта оонньуута эмиэ тэҥнэһиинэн түмүктэннэ. Аны бүгүн кыыспыт Сайн Юстены (Гаити) кытта оонньуур.

Манна сыһыары тутан эттэххэ, элбэх киһи, бу күрэхтэһиигэ европалар кыайыахтара диэн сылыктаабыттара. Онтукайбыт билиҥҥитэ көрдөрүү маннык: Европа – Америка 12:8, 6:14, 8:12, 9:11. Көрбүккүт курдук, түөрт түһүмэх кэнниттэн америкалар 3:1 ахсаанынан кыайан иһэллэр. Аны алта түһүмэх баар. Сылыктааһын туолуо дуо?

Оонньууну интернеккэ Россия дуобакка федерациятын официальнай сайтыгар https://shashki.ru/ көрүөххүтүн, билсиэххитин сөп. Онно Европа-Америка онлайн-матчтарын бырагыраамата, партиялара, рауннарынан көрдөрүүлэрэ тута суруллан иһэр.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *