Дуобатчыттар күрэхтэһэллэр

Аан дойду үрдүнэн коронавирус ыарыыта тарҕанан, ханан даҕаны күрэхтэһиилэр ыытыллыылара тохтотуллан турар. Ол эрээри, Саха Республикатын дуобакка федерациятын уонна тренердэрин көҕүлээһининэн урукку үгэһи сөргүтэн, билиҥҥи сайдыылаах кэмҥэ сайт нөҥүө онлайн күрэхтэһиини тэриллэрэ кэрэхсэбиллээх диэххэ сөп.

Ол курдук, тренердэр: А.С. Соломонов, В.П. Варламов, В.Н. Кычкин, П.О. Павлов – муус устар 26 күнүгэр нуучча дуобатыгар кыргыттарга уонна уолаттарга республикатааҕы дистанционнай күрэхтэһиини тэрийэн ыыттылар. Карантин кэмигэр бу иккис күрэхтэһиигэ барыта 168 дуобатчыт кытынна.

Турнир балаһыанньатын быһыытынан, кыттааччылар саастарынан араарыллыбыт түөрт бөлөххө күрэхтэстилэр.

Түмүккэ, 2002-2006 сыллаахтарга Горнайтан маастарга кандидат Арсен Михайлов кыайыы үөрүүтүн биллэ. Оттон бу саастаах кыргыттарга спорт маастара Тунаара Федорова (Дьокуускай) тэҥнээҕин булбата.

2012-гэ диэри сыллаахтарга кыргыттарга Дьокуускайтан Сайаана Николаева бастаата. Оттон уолаттарга Хаҥаластан Паша Дунайцев, Дьокуускайтан Денис Самойлов уонна Эрчим Макаров – 5,5-тии очукуону хомуйдулар, онуоха судьуйалар быһаарыыларынан, хаачыстыбата ордук буолан кыайыылааҕынан Паша Дунайцев ааҕылынна.

2007-2009 сс. төрөөбүттэр Хаҥаластан маастарга кандидат Айсен Егоров кыахтаахтык бастаата. Кыргыттар бөлөхтөрүгэр Дьокуускайтан маастарга кандидаттар Айыына Протопопова уонна Нарыйаана Сергеева түмүккэ 6,5-дыы очукуоланнылар. Онуоха быраабыла быһыытынан кыайыылааҕынан А.Протопопова буолла.

2010-2011 сыллаахтар бөлөхтөрүгэр Мэҥэ Хаҥаластан Данил Сивцев эрэллээхтик бастаата. Оттон бу саастаах кыргыттарга Дьокуускайтан Сайаана Николаева кыайда.

Кыайыылаахтар федерация аатыттан грамоталарынан уонна республика дуобакка гроссмейстердара олохтообут харчынан бириистэринэн наҕараадаланнылар.

Күрэхтэһиигэ Дьокуускай, Мэҥэ Хаҥалас, Амма, Чурапчы, Горнай, Үөһээ Бүлүү, Хаҥалас, Чурапчы, Ньурба, Нам эдэр дуобатчыттара көхтөөхтүк кыттыннылар. Бу, биһиги республикабытыгар дуобат оонньуута киэҥник тарҕаммытын уонна билиҥҥи карантин кэмигэр үөрэнээччилэр иллэҥ кэмнэрин туһалаахтык атааралларын, күрэхтэһэр үөрүйэхтэрин ыһыктыбаттарын кэрэһэлиир.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *