Дуобатчыттар күрэхтэһэллэрин тохтоппоттор

Аан дойдуга коронавирус дьаҥа тарҕанан, туох баар тэрээһиннэр тохтоон турар кэмнэригэр Россия дуобакка федерацията араас таһымнаах онлайн-күрэхтэһиилэри тэрийэр. Онон дуобатчыттар төһө да дьиэлэригэр олордоллор, күрэхтэһэллэрин тохтоппоттор.

Ол курдук, карантин кэмигэр үөрэнээччилэргэ элбэх күрэхтэһии ыытыллыбытыгар, Саха сирин эдэр дуобатчыттара эриэ-дэхси ситиһиилэннилэр. Международнай гроссмейстер Матрена Ноговицына Европа сүүмэрдэммит хамаандатын састаабыгар киирэн соторутааҕыта Америка континенын хамаандатын кытта сүүс харахтаах дуобакка онлайн-күрэхтэһиигэ кыттыбыта. Европа хамаандата кыайарыгар бэйэтин кылаатын киллэрсибитэ.

Оттон бэс ыйын 13 күнүгэр нуучча дуобатыгар Россия уонна Беларусь хамаандаларын онлайн-матчтара тэрилиннэ. Россия сүүмэрдэммит хамаандатын састаабыгар Саха сириттэн международнай гроссмейстер Николай Гермогенов киллэриллэн оонньоото. Кини үс утарсааччытын кыайда, биэстэ тэҥнэстэ уонна иккитэ хоттордо. Хамаанданан түмүккэ 64:36 ахсаанынан кыайыыны Россия ситистэ.

Эмиэ Россия дуобакка федерациятын көҕүлээһининэн ыытыллыбыт, тренер В.В. Мисник кэриэһигэр сүүс харахтаах дуобакка Бүтүн Россиятааҕы онлайн-күрэхтэһиигэ тоҕус саастаахтарга – Олег Винокуров (Покровскай), уон түөрт саастаахтарга – Дайаана Алексеева (Дьокуускай) кыайыылааҕынан таҕыстылар. Оттон Россия күнүгэр ыытыллыбыт Россиятааҕы күрэхтэһиигэ уон түөрт саастаахтарга – Айыына Протопопова, уон сэттэ саастаахтарга – Сандаара Апросимова бастакы миэстэҕэ тахсан, РФ дуобакка президенэ А.Ю. Никитин илии баттааһыннаах дипломнарынан наҕараадаланнылар. Ити курдук, бу күрэхтэһиилэргэ өссө хас да эдэр дуобатчыппыт иккис-үһүс миэстэлэри ыллылар.

Дьиэҕитигэр олоруҥ! Бэйэҕитин уонна тулалыыр чугастааҕы дьоҥҥутун харыстаан! Чэгиэн-чэбдик буолуҥ!  

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *