Дуобатчыттар күрэхтэһиилэрин тохтоппоттор

Аан дойдуга коронавирус ыарыы тарҕанан спорт күрэхтэһиилэрэ барыта тохтоон турар кэмигэр саахымакка аан дойду чемпиона Магнус Карлсен онлайн турнир тэрийбитин тэҥэ, Саха сирин дуобакка тренердэрэ: А.С. Соломонов, В.П. Варламов, В.Н. Кычкин, П.О. Павлов – муус устар 26 күнүгэр нуучча дуобатыгар кыргыттарга уонна уолаттарга республикатааҕы дистанционнай күрэхтэһиини ыыталлар.

Турнир балаһыанньатын быһыытынан, кыттааччылар саастарынан араарыллыбыт түөрт бөлөххө күрэхтэһэллэр. Ол курдук, 2012 сыллаахтар бастакы, 2010-2011 сс. иккис, 2007-2009 сс. үһүс уонна 2002-2009 сс. төрдүс бөлөххө киирэн оонньуохтара.

Турнир муус устар 26 күнүгэр – баскыһыанньаҕа күнүс 11 чаастан playok.com сайт иһинэн саҕаланар.

Кыайыылаахтар кыргыттарга уонна уолаттарга быһаарыллыахтара уонна грамоталарынан, гроссмейстердар олохтообут харчынан бириистэринэн наҕараадаланыахтара.

Ааспыкка, муус устар 18 күнүгэр түмүктэммит Дуобат фестивалын маннык күрэхтэһиитигэр Саха сирин таһынан өссө Узбекистан, Украина, Уганда, Израиль, Франция, Португалия, Красноярскай, Ижевскэй куораттар дуобатчыттара кыттаннар, күрэхтэһиини норуоттар икки ардыларынааҕы таһымҥа таһаарбыттара.

Онно маастарга кандидаттар бөлөхтөрүгэр бастакы миэстэни Сайаана Николаева (Дьокуускай) ылбыта. Иккис миэстэҕэ Дайаана Кондратьева (Үөһээ Бүлүү) тахсыбыта. Ити курдук, эр дьон бөлөҕөр Петр Аргунов (Дьокуускай) кыайыыны ситиспитэ. Оттон бастакы-иккис разрядтаахтарга Сайаана Макарова уонна Данил Макаров (иккиэн – Амма) бастаабыттара. Эдэрдэргэ үһүс разрядтаахтарга эмиэ Амма дуобатчыттара Костя Марков уонна Алиса Матвеева кыайбыттара.

Маастардар уонна маастарга кандидаттар бөлөхтөрүгэр бастакы миэстэни Дайаана Алексеева (Дьокуускай) уонна Марк Стругач (Израиль) ылбыттара. Оттон бастакы-иккис разрядтаахтарга Александр Попов (Ижевскай) уонна Натали (Украина) кыайбыттара. Онон, билигин төһө да аан дойду үрдүнэн коронавирус ыарыыта тарҕаммытын үрдүнэн, дуобатчыттар дьиэлэригэр олорон, онлайн күрэхтэһиигэ кыттан, күрэхтэһэллэрин тохтоппоттор.

Бу туһунан биһиэхэ СР Спорка эрэллэри бэлэмнэнии киинин дуобакка тренерэ, спорт маастара Иван Олегович Павлов иһитиннэрдэ.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *