Дуобатчыттары эҕэрдэлиибин! Кэлэр да өртүгэр саха аатын дорҕоонноохтук ааттаталларыгар баҕарабын!

Турцияҕа ыытыллыбыт 64 харахтаах дуобакка Аан  дойду чемпионатыгар саха дуобатчыттара улахан ситиһиилэннилэр. Бу улахан таһымнаах күрэхтэһии түмүгүнэн мин баҕа санааларбын кылгастык үллэстиэхпин баҕарабын.                 

Аан дойду, Азия, Россия дуобакка федерацияларын салайбыт, билигин Саха сирин  дуобакка федерациятын салайа олорор Владимир Ильич Птицын 1993 сылтан саха  дуобатын федерациятын салайыаҕыттан 27 сыл устата инникини өтө көрөн,  фундаментально салайан үлэлии-хамсыы олорор. Бу сыллар усталарыгар улуу дуобатчыт  Виктор Сергеевич Литвинович үөрэнээччитэ Александр Гаврильевич Азаров Санкт-Петербургтан кэлиэҕиттэн, республика дуобакка старшай тренеринэн үлэлиир.

Бу үлэлэр түмүктэрэ: саха  дуобатчыттара 64 харахтаах дуобакка классическай программаҕа Аан дойдуга 13-тэ бастаатыбыт, 14 гроссмейстерданныбыт!

Сүүс харахтаах дуобакка чулуу дуобатчыппыт Игорь Андреевич Никифоров тэлбит,  Россия үтүөлээх тренерэ Кычкин Николай Николаевич — 1 оҥкуллаабыт суолларынан  Россия үтүөлээх тренерэ Кычкин Николай Николаевич — 2 саха дуобатчыттара Аан  дойдуга бастыҥнар ахсааннарыгар киирэллэрин туһугар таһаарыылаахтык үлэлии  сылдьар.

Саха сиригэр детсадтарга, оскуолалар  начаалынай кылаастарыгар дуобат оонньуутун программаҕа киллэрэн үөрэтэргэ, сайдарга кэмэ кэлбитэ ыраатта. Бу киирдэҕинэ, саха омуга нация быһыытынан  духуобунай сайдыытын саҕаланыыта буолуоҕа! Саха  сирин  правительствота, салайар  эргимтэтэ дуобат спордун болҕомтоҕо ылыахтарын, өйүөхтэрин наада!

Бу улахан ситиһиилэринэн дуобатчыттарбын эҕэрдэлиибин! Кэлэр да өртүгэр Аан дойду түһүлгэлэригэр саха аатын дорҕоонноохтук ааттаталларыгар баҕарабын!

Василий КУПРИЯНОВ, Намнааҕы  республиканскай спортивнай оскуола Мэлдьэхситээҕи филиалын дуобакка тренерэ, ССРС спордун маастара, Саха сирин үтүөлээх тренерэ, ветераннарга 64 харахтаах дуобакка түргэн программаҕа Аан дойду чемпиона, Таатта улууһун уонна Мэлдьэхси нэһилиэгин бочуоттаах олохтооҕо.

Добавить комментарий

Ваш адрес email не будет опубликован. Обязательные поля помечены *