Дуобатчыттарбыт сүрүн Кубогы тэҥэ, сэттэ мэтээллээх кэллилэр

Бу ый 8-15 күннэригэр Зеленоград куоракка кулгаахтарынан инбэлииттэр 24-гэр диэри саастаахтарга 64 уонна 100 харахтаах дуобаттарга биирдиилээн уонна хамаанданан бастыыр иһин Россия Кубогар күрэхтэһиилэрэ ыытыллан түмүктэннэ.

Онно гроссмейстер Петр Ушницкай иитиллээччилэрэ, республикатааҕы коррекционнай оскуола үөрэнээччилэрэ: Саша Ефимов, Сайыына  Юнчанова, Джульяна Андреева, Ганя Иванов ситиhиилээхтик кытыннылар.

Нуучча дуобатыгар Саша Ефимов уонна Джульяна Андреева утарсааччыларын барыларын кыайаннар, бастаатылар. Сайыына Юнчанова 2-с миэстэҕэ тигистэ. Сүүс харахтаахха Саша Ефимов, Сыйыына Юнчанова эмиэ олус эрэллээхтик кыайдылар. Джульяна Андреева 2-с, Ганя Иванов 3-с миэстэҕэ тигистилэр.

Онон биһиги спортсменнарбыт Россия күрэхтэһиититтэн 7 мэтээли аҕаллылар. Хамаанданан 64 уонна 100 харахтаах дуобаттарга атыттары олох тулуппатылар, Кубогы эрэллээхтик ылары ситистилэр.

Түгэнинэн туhaнан, махтаныам этэ, Ньурба улууһун спорка управлениетын начаалынньыгар Максимов Александр Васильевичка, бу күрэхтэһиигэ баран кыттан кэлэрбитигэр кини сүрдээх улахан көмөнү оҥорбутугар. Ньурба спортсменнара хамаандаҕа 2 кыhыл көмүс, 1 боруонса мэтээллэри аҕаллылар, — диир, хамаанданы салайан илдьэ сылдьыбыт гроссмейстер Петр Петрович Ушницкай.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *